ភ្នំពេញ ៖ អំពើហិង្សាក្នុងគ្រួសារ ការរំលោភសេពសន្ថវៈ អំពើជួញដូរ ការធ្វើអាជីវកម្មផ្លូវភេទលើស្រី្ដ និងកុមារ បញ្ហាគ្រឿងញៀន ក្មេងទំនើងនៅតែជាបញ្ហាប្រឈមចំពោះមុខរបស់យើងនៅកម្ពុជា បើទោះបីរាជរដ្ឋាភិបាលបានដាក់ចេញនូវគោលការណ៍ឲ្យអនុវត្ត គោលនយោបាយភូមិឃុំ មានសុវត្ថិភាព ច្បាប់ និងចាត់វិធានការដាក់ទោសទណ្ឌដល់ជនល្មើស រួមទាំងការធ្វើអាជីវកម្ម ការកេងប្រវ័ញ្ច កម្លាំងពលកម្ម និងផ្លូវភេទ និងការងារទាំងឡាយណា ដែលធ្វើឲ្យប៉ះពាល់ដល់សុខុមាលភាពរបស់កុមារយ៉ាងក្ដី។
នេះបើតាមការបញ្ជាក់ឲ្យដឹងពីលោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច តំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោហ៊ុន សែន ក្នុងឱកាសផ្សព្វផ្សាយលទ្ធផល នៃការសិក្សាស្រាវជ្រាវ ថ្នាក់ជាតិ ស្ដីពីអំពើហិង្សាលើកុមារ នៅសណ្ឋាគារសូហ្វីតែលភោគីត្រា កាលព្រឹកថ្ងៃទី២២ ខែតុលា ឆ្នាំ២០១៤ ដែលរៀបចំដោយអន្ដរក្រសួង និងអង្គការសង្គមស៊ីវិលដែលពាក់ព័ន្ធ។
លោកជំទាវម៉ែន សំអន បានបញ្ជាក់ថា ដោយផ្អែកលើការសិក្សាស្រាវជ្រាវ អំពើហិង្សាក្នុង គ្រួសារ ការរំលោភបំពាន ការជួញដូរផ្លូវភេទលើស្ដ្រី និងកុមារ ក្មេងទំនើង គ្រឿងញៀននៅតែជាបញ្ហាប្រឈមចំពោះមុខនៅឡើយនោះ ក្នុងនាមរាជរដ្ឋាភិបាលកម្ពុជាលោកជំទាវសូមអំពាវនាវ ដល់ប្រជាពលរដ្ឋគ្រប់រូបគ្រប់ស្ថាប័នជាតិ ដៃគូអភិវឌ្ឍន៍ សង្គមស៊ីវិល អង្គការជាតិ អន្ដរជាតិ ទាំងអស់សូមចូលរួមទប់ស្កាត់ និងអន្តរាគមន៍ ដើម្បីឲ្យឆ្លើយតបឲ្យបានទាន់ពេលវេលា និងឲ្យមានប្រសិទ្ធភាព ចំពោះអំពើហិង្សាលើស្ដ្រី និងកុមារទាំងអស់គ្នា។
លោកជំទាវបានបន្តថា ដើម្បីកាត់បន្ថយបញ្ហាការរំលោភបំពានអំពើហិង្សាលើកុមារ ការកេងប្រវ័ញ្ចផ្លូវភេទ ការជួញដូរមនុស្ស រាជរដ្ឋាភិបាលបាន និងកំពុងដាក់វិធានការទៅឲ្យក្រសួងស្ថាប័នពាក់ព័ន្ធចំនួន១២ ត្រូវតែបន្តអនុវត្តឲ្យបានម៉ឺងម៉ាត់ និងរួមគ្នាចាត់វិធានការឲ្យបានតឹងរ៉ឹងបំផុតដូចជាក្រសួងមហាផ្ទៃ , ក្រសួងផែនការ , ក្រសួងកិច្ចការនារី, ក្រសួងសង្គមកិច្ច អតីតយុទ្ធជន និងយុវនីតិសម្បាទា, ក្រសួងអប់រំយុវជន និងកីឡា ,ក្រសួងសុខាភិបាល ,ក្រសួងការងារ , ក្រសួងយុត្តិធម៌ ,ក្រសួងទេសចរណ៍ ,ក្រសួងព័ត៌មាន ,ក្រសួងធម្មការ និងសាសនា និងក្រុមប្រឹក្សាជាតិកម្ពុជា ដើម្បីកុមារត្រូវបន្ដរួមគ្នា ដោយចាត់វិធានការផ្លូវច្បាប់ សំដៅលុបបំបាត់រហូតដល់កម្រិតអប្បបរមា នូវអំពើហិង្សា និងការរំលោភបំពានលើកុមារឲ្យបានទាន់ពេលវេលា និងបានល្អ ប្រសើរ ៕