ក្រចេះ ៖ លោកតាំង ទ្រី អ្នកកាសែតមួយរូបនៅខេត្តក្រចេះ ត្រូវបានឈ្មួញឈើបាញ់សម្លាប់កាលពីរំលងអាធ្រាតឈានចូលថ្ងៃទី១២ ខែតុលា ឆ្នាំ២០១៤។ ជនរងគ្រោះត្រូវបាញ់ចំក្បាល ខណៈពេលដែលជិះក្នុងរថយន្ត។ ហេតុការណ៍នេះបានកើតឡើងនៅលើផ្លូវជាតិកាច់ទៅភូមិទួលពន្លៃ ឃុំឃ្សឹម ស្រុកស្នួល ។ បន្ទាប់បាញ់សម្លាប់ជនរងគ្រោះរួចជនល្មើសបានគេចខ្លួនបាត់។
លោកអធិការស្រុកស្នួលបានប្រាប់សារពត័មានក្នុងស្រុកអោយដឹង ថា ជនរងគ្រោះមានឈ្មោះ តាំង ទ្រី ស្ថិតនៅសមាគមអ្នកសារព័ត៍មានខ្មែរប្រជាធិបតេយ្យ ត្រូវជនល្មើសបានបាញ់មួយគ្រាប់ចំចិញ្ចើមជនរងគ្រោះ។
សេចក្តីរាយការណ៍បានអោយដឹងថា នៅមុនពេលកើហេតុជនរងគ្រោះនិងមិត្តភិក្តរួមការងារបានជិះឡានទៅមើលក្រុមឈ្មួញធ្វើសកម្មភាពដឹកជញ្ជូនឈើនៅចំណុចជួរក្រាំង ឃុំខ្សឹម ស្រុកស្នួល ។ នៅពេលទៅដល់ ថៅកែឈើបានហៅ“ចរចា” ហើយក៏មានការប្រទាញប្រទង់គ្នារហូតឈាន ដល់ការផ្ទុះអាវុធ ។ បន្ទាប់ពីបាញ់ស្លាប់រួច ជនល្មើសបានជិះឡានលុចស៊ីស៤៧០ ពណ៌ខ្មៅ គេចខ្លួន តែបើកបានប្រមាណ៥០០ម៉ែត្រ ពីកន្លែងកើតហេតុ ឡានក៏ក្រឡាប់ ជនល្មើសក៏រត់គេចខ្លួនបាត់ទៅ ។
បុរសម្នាក់ឈ្មោះ សាត សិដ្ឋ ដែលជិះឡានជាមួយជនរងគ្រោះ សមត្ថកិច្ចកំពុងតែធ្វើការសាកសួរ។
លោក អ៊ុល ឆាយ មេបញ្ជាការអាវុធហត្ថស្រុកស្នួល បានអោយដឹង ថា សមត្ថកិច្ចកំពុងដំណើរ ការស្រាវជ្រាវ និងបានកំណត់មុខសញ្ញារួចហើយ។
សេចក្ដីរាយការណ៍នានាពីខេត្តក្រចេះ បានឲ្យដឹងដែរថា ឈ្មួញឈើដែលបានបាញ់សម្លាប់ អ្នកកាសែតនោះត្រូវបានគេសង្ស័យទៅលើ ឈ្មោះ ហៀង ជាមន្ត្រីប៉ូលិសខេត្តមណ្ឌលគិរី ដែលឥឡូវនេះកំពុងរត់គេចខ្លួន ។ ដោយឡែក សមត្ថកិច្ចក៏បានធ្វើការឃាត់ខ្លួន អ្នកបើកបររថយន្ដមួយបាំងកន្លះ សម្រាប់ដឹកឈើ ឲ្យឈ្មោះ ហៀង យកមកធ្វើការសាកសួរ ៕