ភ្នំពេញ ៖ ធនាគារអភិវឌ្ឍន៍អាស៊ី កាលពីពេលថ្មីៗនេះបានព្រមានថា កម្ពុជា នឹងមិនទាន់ត្រៀមខ្លួនរួចរាល់សម្រាប់សហគមន៍សេដ្ឋកិច្ចអាស៊ាននៅឆ្នាំក្រោយទេប្រសិនបើកម្ពុជាមិនធ្វើឲ្យមានការរីកចម្រើនលើវិស័យសំខាន់ៗមួយចំនួនដូចជាកំណែទម្រង់គយ។
ប៉ុន្តែកាលម្សិលមិញ លោកនាយករដ្ឋមន្ត្រី ហ៊ុន សែន បានថ្លែងថា លោកបារម្ភអំពីបញ្ហាទូទៅជាងដែលអាចនឹងធ្វើឲ្យសមាហរណកម្មថ្នាក់តំបន់នេះធ្លាក់ផ្លូវ។
លោកបានថ្លែងក្នុងអំឡុងពិធីចែកសញ្ញាបត្រដល់និស្សិតសាកលវិទ្យាល័យឯកទេសនៃកម្ពុជានៅកោះពេជ្រ កាលពីម្សិលមិញថា៖ «យើងកំពុងឆ្ពោះទៅរកសហគមន៍សេដ្ឋកិច្ចអាស៊ាននៅ ឆ្នាំ២០១៥ ហើយប្រសិនបើមិនមានការសម្របសម្រួលទេ វានឹងមិនអាចទៅរួចទេ ក្នុងការអនុវត្តស្តង់ដារតែមួយក្នុងអាស៊ានលើបញ្ហាមួយចំនួនដូចជា ប្រព័ន្ធតុលាការនិងច្បាប់ចរាចរណ៍»។
លោកថ្លែងបន្តថា ៖ «ពិតណាស់ យើងមានការលំបាក ដូចជាប្រទេសសមាជិកមួយចំនួនប្រើច្បាប់ចរាចរណ៍ផ្សេងគ្នាដូចជាការបើកឡានប្រកាន់ស្តាំនិងប្រកាន់ឆ្វេង។
លោកក៏បានសម្តែងក្តីបារម្ភផងដែរអំពីប្រទេសមួយចំនួនដែលប្រើប្រព័ន្ធច្បាប់ខុសគ្នា។ «ប្រទេសមួយចំនួនប្រើច្បាប់ប្រព័ន្ធអង់គ្លេសនិងប្រទេសមួយចំនួនប្រើប្រព័ន្ធច្បាប់បារាំង»៕