អាមេរិកបានសម្លឹងមើលការដាក់សម្ពាធទប់ស្កាត់លើសម្ព័ន្ធហិរញ្ញវត្ថុក្នុងគោលដៅកាត់បន្ថយកម្មវិធីបរមាណូ និង កាំជ្រួចមីស៊ីលរបស់កូរ៉េខាងជើង នោះ គឺការដាក់សម្ពាធនិងដកហូតថវិកានៅធនាគារក្រៅប្រទេស ។
វិធីសាស្ត្រដែលដាក់សម្ពាធមានប្រសិទ្ធភាពបំផុតដល់រដ្ឋាភិបាលទីក្រុងព្យុងយ៉ាងនោះ គឺដាក់សម្ពាធលើហិរញ្ញវត្ថុ និងដកហូតទ្រព្យសម្បត្តិរបស់គ្រួសារមេដឹកនាំ គឹម ជុងអ៊ុន ដែលមានទឹកប្រាក់រហូតដល់ទៅ ១០០០ លានដុល្លារដាក់នៅក្នុងធនាគារក្រៅប្រទេស ។
ក្នុងពេលជាមួយគ្នានោះ ក្រុមប្រឹក្សាសន្តិសុខអង្គការសហប្រជាជាតិ (អ.ស.ប.) ក៏បានបង្កើនការដាក់ទណ្ឌ កម្មដល់ទីក្រុងព្យុងយ៉ាងក្រោយពីការសាកល្បងគ្រាប់បែកបរមាណូជាលើកទី ៣ ។
មេដឹកនាំ គឹម ជុងអ៊ុន ត្រូវបានគេដឹងថា មានទឹកប្រាក់ ១.០០០ លានដុល្លារ នៅធនាគារបរទេស ។ សារព័ត៌មានវ៉ាស៊ីនតោន បានដកស្រង់សម្តីមន្ត្រីចារកម្មអាមេរិកដែលមិនបញ្ចោញឈ្មោះបានឱ្យដឹងថា លោក គឹមជុង អ៊ុន និងគ្រួសារមានទ្រព្យសម្បត្តិផ្ញើនៅធនាគារស្វីស អូទ្រីស និងលុចហ្សំបួរ សរុបដលល់ទៅ ១០០០ លានដុល្លារ ។
ប្រភពព័ត៌មានឱ្យដឹងថា វិធីសាស្ត្រដែលអាចដាក់សម្ពាធទៅលើមេដឹកនាំ គឹម ជុងអ៊ុន បានគឺប្រព័ន្ធហិរញ្ញ វត្ថុ និងដកហូតទ្រព្យសម្បត្តិសម្ងាត់របស់គ្រួសារ គឹម ជុងអ៊ុន ដើម្បីយកទៅសងបំណុលរបស់ជាតិ ។
ការដាក់សម្ពាធលើប្រព័ន្ធហិរញ្ញវត្ថុ ដូចជាការផ្តាច់ជំនួយដ៏សំខាន់សម្រាប់កម្មវិធីបរមាណូ កាំជ្រួចមីស៊ីល របស់កូរ៉េខាងជើង ដោយទឹកប្រាក់នោះ ទៅសងបំណុលដែលកូរ៉េខាងជើងជំពាក់ប្រទេសដទៃទៀត ។
តាមការប៉ាន់ប្រមាណទឹកប្រាក់ ដែលកូរ៉េខាងជើងកំពុងតែជំពាក់ប្រទេសចំនួន ៣០ មានដល់ទៅ ១៤ ពាន់លានដុល្លារ ក្នុងនោះ ជប៉ុន ៤០០ លានដុល្លារ, ស៊ុយអ៊ែត ៣០០ លានដុល្លារ, អឺរ៉ុង ៣០០ លានដុល្លារ អាល្លឺម៉ង់ ៣០០ លានដុល្លារ, ថៃ ៤០០ លានដុល្លារ, ស្វីស ១០០ លានដុល្លារ និងអ៊ីរ៉ាក់ ៥០ លានដុល្លារ ។
បណ្តាប្រទេសដែលជាម្ចាស់បំណុល របស់កូរ៉េខាងជើងបានស្នើដល់ទីក្រុង ព្យុងយ៉ាងទូទាត់ប្រាក់បំណុល ទាំងនោះ ប៉ុន្តែចិន-រុស្ស៊ី រក្សាការស្ងៀមស្ងាត់ មិនទាមទារបំណុលនោះឡើយ ។ ចិនជាម្ចាស់បំណុលធំបំផុតរបស់ កូរ៉េខាងជើង ដែលមានទឹកប្រាក់ដល់ទៅ ៦,៩៨ ពាន់លានដុល្លារ បន្ទាប់មករុស្ស៊ីក៏បានឱ្យកូរ៉េខាងជើងខ្ចីដល់ទៅ ១,១ ពាន់លានដុល្លារផងដែរ ៕