ជាក្តីកង្វល់មួយរបស់រាជរដ្ឋាភិបាល ហើយក៏មានអង្គការ សង្គមស៊ីវិញមួយចំនួនចូលរួមជាមួយរាជរដ្ឋាភិបាល ក្នុងការកាត់បន្ថយគ្រោះថ្នាក់ចរាចរនេះដែរ ប៉ុន្តែករណីគ្រោះថ្នាក់ចរាចរនៅតែជាបញ្ហាប្រឈមក្នុងសង្គមជាតិ ទាំងមូល ស្លាប់ របួស ខូចខាតទ្រព្យសម្បត្តិ ជារៀងរាល់ថ្ងៃ គិតជាទឹកប្រាក់ដែល បាត់បង់រាប់លានដុល្លារក្នុង១ឆ្នាំៗ ។
ផ្តើម ចេញពីក្តីកង្វល់រឿងគ្រោះថ្នាក់ចរាចរនេះ នាយឧត្តមសេនីយ៍ យុន ឈុន្នី អគ្គស្នងការរងនគរបាលជាតិ បានធ្វើការអំពាវនាវដល់អាជ្ញាធរ សមត្ថកិច្ច គ្រប់លំដាប់ថ្នាក់ត្រូវរួមគ្នា ធ្វើការអប់រំផ្សព្វផ្សាយ ច្បាប់ចរាចរអោយបាន ទូលំទូលាយ ដល់ប្រជាពលរដ្ឋ និងសូមអោយប្រជាពលរដ្ឋគោរពច្បាប់ចរាចរទាំងអស់គ្នា ។
ប្រសាសន៍ អំពាវនាវថ្មីនេះនៅ គ្រាដែល នាយឧត្តមសេនីយ៍អគ្គស្នងការរងនគរបាលជាតិអញ្ជើញជាអធិបតីក្នុង កិច្ចប្រជុំបូកសរុបការ ងារចរាចរណ៍ផ្លូវគោករយៈពេល៩ខែ នៅស្នងការដ្នាននគរបាលខេត្តកណ្តាលព្រឹកថ្ងៃទី៩ ខែតុលា ឆ្នាំ២០១៤ និងលើកទិសដៅការងារត្រីមាសទី៤ឆ្នាំ២០១៤។
កិច្ចប្រជុំ បូកសរុបនេះដែរ មានការចូលរួមពីលោកឧត្តមសេនីយ៍ត្រី អ៊ាវ ចំរើន ស្នងការនគរបាលខេត្ត , ស្នងការរងទទួលបន្ទុក ,ស្ថាប័នតុលាការ ,ស្ថាប័នមន្ទីរសាធារណៈការខេត្ត ,អង្គភាពកងរាជអាវុធហត្ថខេត្ត ,អធិការ-អធិការរងទទួលបន្ទុកទាំង១១ស្រុក-ក្រុង និងនាយ-នាយរងប៉ុស្តិ៍នគរបាលរដ្ឋបាលទូរទាំងខេត្តកណ្តាល ។
របាយការណ៍ ស្វាគមន៍របស់លោកឧត្តមសេនីយ៍ត្រី អ៊ាវ ចំរើន ស្នងការនគរបាលខេត្តបានឲ្យដឹងថា ក្នុងរយៈពេល៩ខែឆ្នាំ២០១៤នេះ(គិតពីថ្ងៃទី១ ខែមករា ដល់ថ្ងៃទី៣០ ខែកញ្ញា) គ្រោះថ្នាក់ចរាចរណ៍ផ្លូវគោកបានកើតមានឡើងចំនួណ១៧៧លើក បណ្តាលឲ្យមនុស្សស្លាប់ចំនួន១១០នាក់ ស្រី១៦នាក់ និងបណ្តាលឲ្យរងរបួស៣២១នាក់ ក្នុងនោះស្ត្រី៦៦នាក់ ,ខូចខាតរថយន្ត៤៤គ្រឿង ,ម៉ូតូ២០៨គ្រឿង ,ម៉ូតូសងណ្តោងរ៉ឺម៉ក១១គ្រឿង និងកង់ចំនួន០៥គ្រឿងផងដែរ ។ តាមការសិក្សាលើហានិភ័យ និងព្យសនកម្មខាងលើនេះ ភាគច្រើនបណ្តាលមកពីការបើកបរហួសល្បឿនកំណត់ ,បើកបរសេពគ្រឿងស្រវឹង ,បើកបរមិនយោគយល់គ្នា ,បើកជែងក្នុងស្ថានភាពគ្រោះថ្នាក់ និងបណ្តាលមកពីកំហុសបច្ចេកទេសយានយន្ត…។ល។
តាមរបាយការណ៍ខាងលើបានឲ្យដឹងទៀតថា ក្រោយពីអនុវត្តផែនការសកម្មភាពលេខ០៥២ផ.ក ចុះថ្ងៃទី០៩ ខែសីហា ឆ្នាំ២០១០របស់អគ្គស្នងការដ្ឋាននគរបាលជាតិ ពិនិត្យឃើញថា មានប្រជាពលរដ្ឋដែលជាអ្នកបើកប្រាស់ផ្លូវផ្ទាល់ និងប្រយោ លោកមានឆន្ទៈគោរពរាល់បទប្បញ្ញត្តិគតិយុត្តរបស់រាជរដ្ឋាភិបាល ហើយកិរិយាវិជ្ជមាននោះ បានឆ្លុះបញ្ចាំងឲ្យឃើញស្មារតីទទួលខុសត្រូវខ្ពស់ក្នុងការចូលរួម ស្មារតីកម្មវិធីនយោបាយ និងយន្តការកាត់បន្ថយភាពក្រីក្រពីប្រជាពលរដ្ឋ របស់រាជរដ្ឋាភិបាល តាមរយៈចូលរួមអនុវត្តច្បាប់ស្តីពីចរាចរណ៍ផ្លូវគោក ។
ដោយឡែក បើទោះបីជាមានផលវិជ្ជមានច្រើនក្នុងវិស័យចរាចរណ៍ផ្លូវគោកនេះក្តី យើងនៅតែពិនិត្យឃើញមានប្រជាជនមួយចំនួនតូចនៅតែមានៈមិនគោរព វិធានការចរាចរណ៍ឲ្យបានពេញលេញនៅឡើយ គឺគោរពខ្លាចតែពេលវត្តមាននគរបាលនៅទីនោះ ។
ការមិនគោរពរបស់ប្រជាពលរដ្ឋនៅក្រោយខ្នងសមត្ថកិច្ចនគរបាលនោះ មានដូចជា បើកបរមិនពាក់មួកការពារសុវត្ថិភាព , បើកបរមិនបំពាក់កញ្ចក់មើលក្រោយ , បើកបរម៉ូតូគ្នានស្លាកលេខ និងបើកបររថយន្តមិនពាក់ខ្សែក្រវ៉ាត់ការពារជាដើម ។
ទោះបីជា មានបញ្ហាប្រឈមខ្លះក្នុងជំនាញវិជ្ជាជីវៈ តែយើងខ្ញុំនៅតែមានមោទនភាពបំផុតដោយហេតុថា ទាំងថ្នាក់ដឹកនាំជាតិ និងថ្នាក់ដឹកនាំក្រោមជាតិមានអភិបាលខេត្តកណ្តាលជាប្រធាន លោកបាននិងកំពុងតែបន្តយកចិត្តទុកដាក់លើបញ្ហាមួយនេះ ជាអាទិ៍ សំដៅធ្វើយ៉ាងណាឲ្យអនុសាសន៍ដឹកនាំ និងគោលនយោបាយភូមិ-ឃុំមានសុវត្ថិភាពរបស់រាជរដ្ឋាភិបាលប្រព្រឹត្តទៅ ដោយចិរភាពនីត្យានុកូលភាព និងជាទីទុកចិត្តរបស់ប្រជាពលរដ្ឋ ។
នាឱកាស នោះដែរ លោកនាយឧត្តមសេនីយ៍ យុន ឈុន្នី បានមានប្រសាសន៍ក្រើនរំឭកដល់មន្ត្រីនគរបាលជំនាញខេត្ត ស្រុក និងប៉ុស្តិ៍រដ្ឋបាលត្រូវខឹតខំប្រឹងប្រែង រួមគ្នាអនុវត្តការងារ ភារកិច្ច និងកតព្វកិច្ចរបស់ខ្លួនឲ្យបានល្អប្រសើ ។ ជាពិសេសកម្លាំងនគរបាលទាំងអស់ ត្រូវយកចិត្តទុកដាក់ខ្ពស់ក្នុងការ ត្រួតពិនិត្យដើមទី ដូចជា ចំណតរថយន្តតាក់ស៊ី ,ចំណតរថយន្តដឹកក្រុមកម្មករ ជាដើម ។ កម្លាំងនគរបាលជំនាញត្រូវឆ្លៀតវ័យចេះធ្វើការអប់រំណែនាំដល់ អ្នកបើកបររថយន្តតាក់ស៊ី និងរថយន្តដឹកកម្មករឲ្យចូលរួមគោរពច្បាប់ចរាចរណ៍ផ្លូវគោកទាំងអស់ គ្នា មិនតែប៉ុណ្ណោះ ត្រូវធ្វើការត្រួតពិនិត្យបច្ចេកទេសរថយន្ត ឯកសារពាក់ព័ន្ធនៃរថយន្ត និងអ្នកបើកបរ ។
នាយ ឧត្តមសេនីយ៍ អគ្គស្នងការរងនគរបាលជាតិ បានមានប្រសាសន៍បន្តថា ដើម្បីកាត់បន្ថយគ្រោះថ្នាក់ចរាចរណ៍ឲ្យកាន់តែមានប្រសិទ្ធភាពខ្ពស់ មន្ត្រីនគរបាលប៉ុស្តិ៍ត្រូវចេះរួមចំណែកក្នុងការអនុវត្តគោលនយោបាយ ភូមិ-ឃុំមានសុវត្ថិភាព ។ នៅក្នុងគោលនយោបាយភូមិ-ឃុំមានសុវត្ថិភាពទាំង៩ចំណុចនោះ មានមួយចំណុចពាក់ព័ន្ធការទប់ស្កាត់គ្រោះថ្នាក់ចរាចរណ៍ ។ ដូច្នេះនគរបាលប៉ុស្តិ៍រដ្ឋបាលដែលស្ថិតនៅជិតប្រជាពលរដ្ឋ ត្រូវចេះធ្វើការណែនាំ និងពន្យល់ពីច្បាប់ចរាចរណ៍ដល់ពួកគាត់ជាប្រជាពលដ្ឋឲ្យបានច្រើន ពីការបើកបរយានយន្តគ្រប់ប្រភេទនៅលើផ្លូវថ្នល់ត្រូវពាក់មួកការពារ សុវត្ថិភាព ពុំពាក់កញ្ចក់មើលក្រោយ ជាដើម ។ ពេលដែលពួកគាត់ជាប្រជាពលរដ្ឋបានយល់ដឹងខ្ពស់ហើយនោះ ករណីគ្រោះថ្នាក់ចរាចរណ៍មិនងាយកើតមានឡើងទៅលើពួកគាត់នោះទេ ។
ជាចុងក្រោយ នាយឧត្តមសេនីយ៍ យុន ឈុន្នី បានធ្វើការសំណូមពរដល់ប្រជាពលរដ្ឋ និងមន្ត្រីរាជការគ្រប់មជ្ឈដ្នាន ត្រូវចូលរួមគោរពច្បាប់ចរាចរណ៍ឲ្យបានគ្រប់ៗគ្នា ដើម្បីរួមចំណែកកាត់បន្ថយគ្រោះថ្នាក់ចរាចរណ៍នៅប្រទេសកម្ពុជា ៕