ភ្នំពេញ៖ នៅព្រឹកថ្ងៃទី៣០ កញ្ញា ម្សិលមិញនេះ តុលាការកំពូល បានបើកសវនាការជំនុំជម្រះសំណុំរឿងលោក ហេង ពៅ អតីតស្នងការនគរបាលក្រុងភ្នំពេញ និងលោកលី រ៉ាស៊ី ព្រមទាំងគូកន ២នាក់ទៀត ក្រោមការចោទប្រកាន់ពីបទមនុស្សឃាត គិតទុកជាមុន និងសមគំនិត ពាក់ព័ន្ធការប៉ុនប៉ងសម្លាប់ លោកចៅក្រម សុក សេដ្ឋាមុន្នី កាលពីចុងឆ្នាំ២០០៣ កន្លងមក ។
នៅក្នុងសវនាការ តុលាការកំពូល ជនជាប់ចោទទាំង ៤ រូប បានឆ្លើយបដិសេធ ដូចៗគ្នាថា ពួកគេពុំបានរៀបចំគម្រោង សម្លាប់លោកចៅក្រម សុក សេដ្ឋាមុនី ដូចការចោទ ប្រកាន់របស់តុលាការនោះទេ ។ ក្នុងនោះ លោក ហេង ពៅ បានបញ្ជាក់ថា លោកពុំបានដឹងអ្វីទាំងអស់ ចំពោះសំណុំរឿងនេះ ។ ក្រោយការសួរដេញដោល តុលាការបានលើកពេលប្រកាសសាលដីកា ទៅថ្ងៃទី២១ ខែតុលា ឆ្នាំ២០១៤ ខាងមុខនេះវិញ ។
គួរបញ្ជាក់ថា លោកហេង ពៅ ជាប់ពាក់ព័ន្ធនឹងបទល្មើស ជាច្រើនករណី ហើយត្រូវបានតុលាការផ្តន្ទាទោស ដាក់ពន្ធនាគារសរុបជិត ១០០ ឆ្នាំ ។ ចំណែកគូកនផ្សេងទៀត រួមមាន លោកលី រ៉ាស៊ី មាន ៦សំណុំរឿង ហើយ ២សំណុំរឿង បានចូលស្ថាពរ រីឯ ៤ សំណុំរឿងទៀត នឹងត្រូវតុលាការកំពូល បើកសវនាការ ជំនុំជម្រះជាបន្តបន្ទាប់ នាពេលខាងមុខនេះ ៕