ក្នុងសុន្ទរកថាថ្លែងទៅកាន់និស្សិតសាកលវិទ្យាល័យកាលពីម្សិលមិញ លោកនាយករដ្ឋមន្ត្រី ហ៊ុន សែន បានថ្លែងថា មានផែនទីបង្ហាញផ្លូវច្បាស់លាស់ ក្នុងការទទួលយកជនភៀសខ្លួនមកតាំងលំនៅថ្មីនៅប្រទេសកម្ពុជា ។ លោកបានបន្តថា កម្ពុជានឹងទទួលយកជនភៀសខ្លួនមួយចំនួនពីអូស្ត្រាលី ផ្អែកលើគោលការណ៍ស្ម័គ្រចិត្ត។ គ្មានអ្នកណាម្នាក់ត្រូវបង្ខំពួកគេឲ្យមកកម្ពុជាទេ ។ កម្ពុជាមានផែនទីបង្ហាញផ្លូវច្បាស់ ក្នុងការទទួលយកជនភៀសខ្លួនទាំងនេះ ហើយគ្មានអ្នកណានឹងស្ម័គ្រចិត្តមកកម្ពុជាទេ ប្រសិនគេមិនដឹងថា កម្ពុជាជាប្រទេសបែបណានោះ។
លោក ឡុង វីសាលោ រដ្ឋលេខាធិការក្រសួងការបរទេស បានប្រាប់អ្នកយកព័ត៌មានថា ក្រុមមន្ត្រីនឹងត្រូវបញ្ជូនទៅកោះ Nauru ដើម្បីធ្វើការវាយតម្លៃលើជនភៀសខ្លួន។
លោកបន្តថា៖ «យើងនឹងបញ្ជូនមន្ត្រីទៅកោះ Nauru ដើម្បីជូនដំណឹងជនភៀសខ្លួនអំពីកម្ពុជា។ ដូចជា ការរស់នៅ ប្រពៃណីទំនៀមទម្លាប់ និងសាសនា»។ លោកបន្ថែមថា ចំនួននិងពេលវេលានៃការមកដល់របស់ជនភៀសខ្លួនមិនទាន់សម្រេចទេ ហើយទីតាំងសម្រាប់ពួកគេរស់នៅក៏មិនទាន់កំណត់ដែរ។
លោកបញ្ជាក់ថា៖ «ការតាំងលំនៅបណ្តោះអាសន្ន និងទីតាំងមកដល់គឺនៅភ្នំពេញ ប៉ុន្តែយើងនៅតែមិនដឹងទីតាំងទេ។ ការតាំងលំនៅជាអចិន្រៃ្តយ៍ និងការធ្វើសមាហរណកម្មក្នុងសហគមន៍កម្ពុជានៅមិនទាន់ដឹងទេប៉ុន្តែគឺនៅក្រៅរាជធានីភ្នំពេញ»។
លោកបានបន្តថា៖ «យើងមិនដឹងថា ជនភៀសខ្លួនប៉ុន្មាននាក់នឹងមកដល់ទេ ប៉ុន្តែលើកដំបូងមានចំនួនតិចតួច។ ប្រសិនមានបញ្ហាក្នុងគម្រោងសាកល្បង [កិច្ចព្រមព្រៀង] នឹងត្រូវធ្វើវិសោធនកម្ម» ៕