រាជធានីភ្នំពេញ ៖ ថ្លែងប្រាប់អ្នកកាសែត ក្រោយជំនួបជាមួយរដ្ឋមន្ត្រីក្រសួងអប់រំ លោក យ៉ែម បុញ្ញឫទ្ធិ ប្រធានគណៈកម្មការទី៧ នៃរដ្ឋសភាបានគាំទ្រចំពោះកំណែទម្រង់ប្រព័ន្ធអប់រំដែលផ្តើមចេញក្នុងឆ្នាំ ២០១៤នេះ។
ក៏ប៉ុន្តែ ប្រធានគណៈកម្មការទី ៧ ក៏បានស្នើឲ្យរដ្ឋមន្ត្រីក្រសួងអប់រំ ត្រួតពិនិត្យបន្ថែមទៀតលើចំណុចចំនួនប្រាំដើម្បីឲ្យជម្រុញឲ្យកំណែទម្រង់របស់ក្រសួងអប់រំទទួលបានជោគជ័យនោះ គុណភាពគ្រូបង្រៀន គុណភាពសិស្ស មធ្យោបាយ កម្មវិធីសិក្សា និង សង្គម រួមទាំងពង្រឹងវិន័យផងដែរ។ ជាមួយគ្នានោះ បញ្ហាដំឡើងប្រាក់ខែគ្រូបង្រៀន ក៏ត្រូវបានស្នើឡើងផងដែរ។
ជាការឆ្លើយតប លោក ហង់ ជួនណារ៉ុន បានលើកឡើងថា រដ្ឋាភិបាលបានសម្រេចរួចហើយលើគោលនយោបាយដំឡើងប្រាក់ខែដល់គ្រូបង្រៀននេះ។ នោះ គឺ មានបួនដំណាក់កាល ដែលដំណាក់កាលទី១ គឺនៅចុងឆ្នាំនេះ រដ្ឋាភិបាលនឹងសម្រួលប្រាក់បំណាច់ លើគ្រូបង្រៀន។ ដំណាក់ទី ២ ចាប់ពីឆ្នាំ ២០១៥ ទៅនឹងដំឡើងប្រាក់ខែបន្ថែម ហើយដំណាក់ទី ៣ ចាប់ពីខែឧសភា ឆ្នាំ ២០១៥ រដ្ឋាភិបាលនឹងបង្កើនប្រាក់ឧបត្ថម្ភដល់គ្រូបង្រៀននៅតំបន់ជួបការលំបាក និងដំណាក់កាលទី ៤ ចាប់ពីខែមេសា ឫ ឧសភាក្នុងឆ្នាំ ២០១៥ រដ្ឋាភិបាលនឹងដំឡើងប្រាក់ខែមួយដំណាក់កាលទៀតដល់គ្រូបង្រៀនជាពិសេសគ្រូនៅសាលាបឋមសិក្សាដែលមានប្រាក់ខែទាប។
ចំពោះការប្រឡងបាក់ឌុបឡើងវិញ ត្រូវបានលោក ហង់ ជួនណារ៉ុន បកស្រាយថា វាជាការផ្តល់ឪកាសដល់សិស្សដែលបានប្រឡងធ្លាក់ ដើម្បីមានឪកាសបានប្រឡងជាប់ឡើងវិញ។ ហើយចំណុចនេះ ក៏ត្រូវបានគណៈកម្មករទី៧ នៃរដ្ឋសភាគាំទ្រផងដែរ។
យ៉ាងណាក៏ដោយ រដ្ឋសភានឹងរៀបចំសិក្ខាសាលាមួយនាពេលខាងមុខ ដើម្បីឲ្យលោករដ្ឋមន្ត្រីក្រសួងអប់រំបំភ្លឺបន្ថែមទៀតអំពីកំណែទម្រង់ក្នុងវិស័យអប់រំរបស់ក្រសួងនេះ។ នេះបើតាមលោក យ៉ែម បុញ្ញឫទ្ធិដដែល៕