ខេត្តសៀមរាប ៖អភិបាលខេត្តបានបើកការដ្ឋានសាងសង់ ផ្លូវចាក់កៅស៊ូ DBST (ផ្លូវត្រាំនាគ) មួយខ្សែដែលមានប្រវែង ២.០០០ម៉ែត្រ ទទឹង ៧ម៉ែត្រ កាលពីព្រឹកថ្ងៃទី១៣ខែកញ្ញាឆ្នាំ២០១៤ ស្ថិត នៅ ភូមិចុង កៅស៊ូ សង្កាត់ស្លក្រាម ក្រុងសៀមរាប។ក្រោមអធិបតីភាពលោក ឃឹម ប៊ុនសុង អភិបាលនៃគណៈអភិបាល ខេត្តសៀមរាប និង លោក នូ ផល្លា ប្រធានក្រុមប្រឹក្សាខេត្ត និងមានការចូលរួមពីសំណាក់ អភិបាលរងខេត្ត អស់លោក លោកស្រី ប្រធាន មន្ទីរ ស្ថាប័ន អង្គភាព អាជ្ញាធរដែនដី និងបងប្អូនប្រជាពលរដ្ឋផងដែរ ។
សេចក្ដីរបាយការណ៍ របស់លោក សូ ប្លាតុង អភិបាលក្រុងសៀមរាបស្ដីទី រួចមក លោកអភិបាលខេត្ត បានមានប្រសាសន៍សំណេះសំណាល ទៅកាន់អ្នកចូលរួមក្នុងកម្មវិធីបើកការដ្ឋានសាងសង់ផ្លូវនេះថា ជាមួយនឹងសមិទ្ធផលជាច្រើន ជាបន្តបន្ទាប់ក្នុង ខេត្ត ជាក់ស្តែងដូចថ្ងៃនេះ អាជ្ញាធរបានបើកការដ្ឋានសាងសង់ផ្លូវ DBST ប្រវែង ២០០០ ម៉ែត្រ នេះគឺជា សមិទ្ធផលបន្ថែមទៀត សម្រាប់ក្រុងសៀមរាប ក៏ដូចជាខេត្តសៀមរាបទាំងមូលផងដែរ ។
លោកអភិបាលខេត្តបានបញ្ជាក់បន្ថែមថា លើការបើកការដ្ឋានផ្លូវត្រាំនាគមួយខ្សែនេះ អាជ្ញាធរខេត្ត គ្រោងនឹងបើកការដ្ឋានសាង់សង់ និងជួសជុលកែលំអផ្លូវមួយចំនួនទៀត ជាបន្តបន្ទាប់ក្នុងក្រុងសៀមរាប ដើម្បីជួយសម្រួលការ ធ្វើដំណើរ របស់ប្រជាពលរដ្ឋ ឲ្យកាន់តែល្អប្រសើរឡើង។ ហើយគម្រោងជួសជុល កែលម្អ និង សាងសង់ផ្លូវក្នុងក្រុងសៀមរាប រួមមាន ៖ ១-ការកែលម្អ និងពង្រីក ផ្លូវជាតិលេខ៦ ដំណាក់កាលទី១ ពីកែងផ្លូវ លោកតា ខៀវ ណឺយ ដល់កែងផ្លូវ ៦០ម៉ែត្រ ប្រវែង ៤៥០ ម៉ែត្រ។ ២-ជួសជុល និងកែលម្អផ្លូវលោកតា ខៀវ ណឺយ ប្រវែង១ ៥០០ម៉ែត្រ និងផ្លូវ ៧មករា (កែងផ្លូវ លោកតា ខៀវ ណឺយ ដល់រង្វង់មូលវត្តដំណាក់) ប្រវែង ១០០០ម៉ែត្រ ។ ៣-ការកែលម្អចិញ្ចឹមផ្លូវ និងរៀបចំ សួនច្បារសងខាងផ្លូវពីស្ពាននាគ ដល់ផ្លូវសាលដឺហ្គោល ប្រវែង៥០០ម៉ែត្រ ។ ៤-ការសាងសង់លូប្រអប់ពីមុខសាលារៀនវត្តបូព៌ ដល់ផ្លូវលោកតាខៀវ ណឺយ ប្រវែង ៩០០ម៉ែត្រ ។ និង ៥-សាងសង់ផ្លូវចាក់បេតុងចាប់ពីមុខ សាលាបឋមសិក្សា វត្តបូព៌ ដល់ផ្លូវលោកតាខៀវ ណឺយ ប្រវែង ៩០០ម៉ែត្រ។ ៦-សាងសង់ផ្លូវចាក់ បេតុងភូមិស្ទឹងថ្មី ចាប់ពីផ្លូវសម្តេច ទេព វង្ស ដល់អតីតភោជនីយដ្ឋានកេសរគោល ប្រវែង ៤៥០ម៉ែត្រ ។ ៧-សាង សង់ផ្លូវចាក់កៅស៊ូប្រភេទ DBST ពីភូមិទ្រាំងស្ពាននាគ(ខាងលិចស្ទឹង) ដល់ស្ពានបច្ចេកទេស(ផ្លូវទៅអង្គរ) ប្រវែង ៧០០ ម៉ែត្រ។ ៨-សាងសង់ផ្លូវចាក់កៅស៊ូ ប្រភេទ DBST ពីផ្លូវភូមិបន្ទាយចាស់ និងភូមិវត្តបូព៌ ដល់ផ្លូវ២១២ ប្រវែង ៨៥០ម៉ែត្រ ផងដែរ ។
ក្នុងឱកាសនោះ លោកក៏បានរំលឹកថា ថ្នាក់ដឹកនាំរដ្ឋាភិបាលកម្ពុជា បានសម្រួលប្ដូរទីតាំងសាលាខេត្ត ក៏ដូចជាមន្ទីរ អង្គភាពជុំវិញខេត្ត បានផ្លាស់មកកៀកជិតប្រជាពលរដ្ឋ ដើម្បីបង្កភាពងាយស្រួលដល់បងប្អូនប្រជាពលរដ្ឋ ក្នុងការមក ទទួលយកសេវាសាធារណៈ។ ដូចនេះ អាជ្ញាធរខេត្ត បានគោរពស្នើសុំទៅ សម្តេចតេជោ ហ៊ុន សែន ដើម្បីរៀបចំ ឲ្យមានទីតាំងរដ្ឋបាលមន្ទីរ អង្គភាពជំនាញ លើផ្ទៃដីទំហំ ៦ហិកតា រហូតមកដល់ពេលនេះ ត្រូវបានទទួលការ ឯកភាព ជាគោលការណ៍ពីប្រមុខរាជរដ្ឋាភិបាលរួចហើយ ពោលគឺនៅចំណុចទីតាំង ដែលបានបើកការដ្ឋានឲ្យដំណើរការចាប់ពីព្រឹកនេះតទៅ ដែលនឹងត្រូវដាក់ឲ្យដេញថ្លៃសាងសង់អគារមន្ទីរ អង្គភាពក្នុងពេលឆាប់ៗ ខាងមុខនេះ ។
លោកអភិបាលខេត្ត បានគូសបញ្ជាក់ថា អាស្រ័យដោយខេត្តសៀមរាប ជាខេត្តទេសចរណ៍ និងជាកន្លែង សន្និសីទ ថ្នាក់ជាតិ-អន្តរជាតិ ដូច្នេះដើម្បីរក្សាបាននូវកិត្យានុភាពជាតិយើង ក៏ដូចជាខេត្តសៀមរាបទាំងមូល គឺយើងត្រូវការ ឲ្យមានហេដ្ឋារចនាសម្ព័ន្ធផ្លូវល្អស្អាត ហើយបើផ្លូវយើងមិនបានល្អស្អាតនោះ វាក៏ជាកក្ដា ប្រឈមដ៏ធំផងដែរ សម្រាប់ការលើកកម្ពស់វិស័យទេសចរណ៍ និងការអភិវឌ្ឍន៍ដទៃមួយចំនួនទៀតផងដែរ រួមទាំងប៉ះពាល់ដល់ សោភ័ណភាពក្រុង ក៏ដូចជាសុខុមាលភាពសាធារណៈ បញ្ហាកក់ស្ទះចរាចរ ជាដើម ៕