រាជធានីភ្នំពេញ ៖ សំរាប់ការប្រកួតដំណាក់កាលទី៥នេះ ក៏ដូចជាការប្រកួតកាលពីដំណាក់កាលទី១ទី២និងទី៣និងទី៤ដែរ ដោយត្រូវ វាយជម្រុះរហូតទាល់តែរកឃើញជើងខ្លាំងប្រចាំដំណាក់កាលទី៥ នេះ ដោយការប្រកួត គឺធ្វើក្នុងថ្ងៃតែមួយនេះ តែ ម្តង។
អ្នកប្រដាល់ចំនួន៨នាក់ នឹងចាប់ផ្តើមវាយជម្រុះដំណាក់កាលទី៥ នៅថ្ងៃព្រហស្បតិ៍ទី២៩ ខែសីហា នេះ នៅលើសង្វៀន TV5 Arena ដែលនេះជាការប្រកួតក្នុងខែទី៥នៃព្រឹត្តិការណ៍ប្រដាល់ដណ្ដើមខ្សែក្រវាត់ជើងឯកបាកាសឆ្នាំ២០១៣។
ពួកគេ ទាំង៨នេះ ខ្លះជាអ្នកប្រដាល់ស្រករមុន ខ្លះជាអ្នកប្រដាល់ថ្មីស្រករក្រោយ។ មុននឹងត្រូវគូគ្នានេះ បានឆ្លងកាត់ការ ចាប់ ឆ្នោត ទាំងអស់ ។ សំរាប់រូបមន្តនៃការប្រកួត អ្នកដែលចាញ់គឺហាលអាវ ឯអ្នកឈ្នះទាំង ៤ នាក់ ត្រូវប្រកួតគ្នាបន្តដោយ ជម្រុះ ចោល ២ នាក់ទៀត ហើយ ២ នាក់ដែលនៅសល់នោះ គឺប្រកួតរកឈ្នះសម្រាប់ត្រៀមប្រកួតដំណាក់កាលផ្ដាច់ព្រ័ត្រ។ និយាយ រួម ក្នុងដំណាក់ កាលប្រកួតជម្រុះនេះ ត្រូវប្រកួតបញ្ចប់ក្នុងមួយថ្ងៃតែម្តង។
អ្នកប្រដាល់ទាំង៨នាក់នោះ រួមមាន សល់ អាម៉ា ក្លិបអាស៊ីកីឡា ត្រូវជួបជាមួយ ឈាន រស្មី ក្លិបរាជសីហ៍បង្ក្រាបគ្រឿងញៀនខេត្ត រតនគិរី។ ញឹក សាលីន ក្លិបរការខ្នុរគុនខ្មែរ ជួបជាមួយយ៉ាម សុផានិត ក្លិបរស្មីកុមារកំព្រា។ កុសល វិសាល ក្លិបសាលវ័ន្តកីឡា ជួបជាមួយឈិន ធារ៉ា ក្លិបអប់រំកាយស្រុកអន្លង់វែង និងមួយគូទៀត សួស យ៉ាត ក្លិបកងទ័ពជើងទឹក ជួបជាមួយម៉ន រ៉ៃយ៉ា ក្លិប ព្រែកឯងកីឡា។
វគ្គ ជម្រុះ៤គូដំបូងក្នុងដំណាក់កាលទី៤នេះ ការប្រកួតមាន ៣ ទឹក។ វគ្គទី ២ ប្រកួត ៥ទឹកដែលនៅសល់តែ៤ នាក់នោះ។ វគ្គទី ៣ ដែលនៅសល់តែ២ នាក់នោះ គឺជម្រុះផ្តាច់ព្រ័ត្រយកម្នាក់សម្រាប់ជាជើងខ្លាំងប្រចាំខែ ហេតុនេះសម្រាប់អ្នក ឈ្នះបាន លុយតម្លៃខ្លួន សរុប១.៨០០.០០០ រៀល និង អ្នកចាញ់សរុបបាន១.៣០០.០០០រៀល។
គួរបញ្ជាក់ថា ព្រឹត្តិការណ៍ប្រកួតដណ្ដើមខ្សែក្រវាត់ទម្ងន់៦០គីឡូក្រាមនេះ មានអ្នកប្រដាល់ចំនួន៦៤នាក់ចូលរួម ហើយប្រកួត ជា៨ ដំណាក់កាល និងមានអ្នកប្រដាល់ ៨ រូប ក្នុងមួយដំណាក់កាលៗ។ មួយខែប្រកួតមួយដំណាក់កាល ដោយត្រូវប្រកួត ជម្រុះយកតែ ម្នាក់ប៉ុណ្ណោះ ហើយអ្នកដែលឈ្នះក្នុងដំណាក់កាលនីមួយៗ នឹងជួបគ្នាផ្ដាច់ព្រ័ត្រនៅខែធ្នូចុងឆ្នាំ ដើម្បីវាយ ដណ្ដើម យកខ្សែក្រវាត់ដែល មានរង្វាន់អមចំនួន១០លានរៀលផងដែរ ៕