សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បាននិវត្តន៍មកដល់កម្ពុជាវិញហើយ បន្ទាប់ពីបានដឹកនាំប្រតិភូទៅចូលរួមពិព័រណ៍ អាស៊ាន ចិន លើកទី១១ និងកិច្ចប្រជុំកំពូល ស្តីពីធុរៈកិច្ច និងវិនិយោគ អាស៊ាន ចិន ដែលប្រព្រឹត្តទៅ នៅទីក្រុងណាន់នីង ខេត្តក្វាងស៊ី នៃសាធារណៈរដ្ឋប្រជាមានិតចិន ។
លោក កៅ កឹមហួន រដ្ឋលេខាធិការក្រសួងការបរទេសកម្ពុជា បានមានប្រសាសន៍ ប្រាប់ក្រុមអ្នកសារព័ត៌មាននៅព្រលានយន្តហោះអន្តរជាតិភ្នំពេញ បន្ទាប់ពីសម្តេច ត្រឡប់មកពីប្រទេសចិនថា ក្រុមហ៊ុននៅក្នុងប្រទេសដែលជាសមាជិកអាស៊ាន បានចូលរួមក្នុងការតាំង ពិព័រណ៍អាស៊ាន-ចិន នោះ មានជាង ២ម៉ឺន ក្រុមហ៊ុន ដែលនេះគឺជាឱកាសមួយដ៏សំខាន់ សម្រាប់ទីផ្សារអាស៊ាន និងផ្តល់ឱកាសដល់ប្រទេសទាំងនោះផងដែរ ដើម្បីប្រកួតប្រជែងគ្នា ។
លោកបន្តថា ទំហំពាណិជ្ជកម្មរវាងអាស៊ាន-ចិន មានការកើនឡើងគួរឲ្យកត់សម្គាល់ តាមរយៈអ្នកវិនិយោគរបស់ចិន ។
សម្រាប់កម្ពុជា តាមរយៈពិពរណ៍អាស៊ាន ចិនបានផ្តល់ផលប្រយោជន៍ ជាច្រើនតាមរយៈការវិនិយោគពីប្រទេសចិនជាពីសេសវិស័យ ហេដ្ឋារចនាសម្ព័ន្ធ ថាមពល ទេសចរណ៍កសិកម្ម ជាដើម ។ ទន្ទឹមនឹងនេះ ប្រមុខរដ្ឋ ប្រមុខរដ្ឋាភិបាលអាស៊ានដទៃទៀត បានលើកនូវការគាំទ្រចំពោះការយកចិត្តទុកដាក់របស់ប្រទេសចិន ដែលផ្តោតការយកចិត្តទុកដាក់ធ្វើយ៉ាងណាឱ្យតំបន់ឧស្សាហកម្មអាស៊ាន ចិន មានការរីកចម្រើនជាងមុន ហើយការបង្កើតនៅធនាគារអាស៊ី សម្រាប់ហេដ្ឋារចនាសម្ព័ន្ធ,ការវិនិយោគ និង ការកសាងវិថីសូន្យ សមុទ្រ គឺសម្រាប់ផ្តល់ផលប្រយោជន៍ដល់បណ្តាប្រទេសដែលបានចូលរួម ៕
