សៀមរាប ៖ ពលរដ្ឋមកពីសហគមន៍ចំនួន៦នៃស្រុកបន្ទាយស្រីប្រមាណជាជាង១០០នាក់បានមក ប្រមូលផ្តុំគ្នានៅមុខសាលាដំបូងខេត្តសៀមរាបដើម្បីរង់ចាំតំណាងរបស់ ពួកគាត់ចំនួន ៧ រូប ដែលត្រូវតុលាការកោះហៅមកសួរនាំពីករណីរុករាន ទ្រព្យសម្បត្តិអ្នកដទៃដែលមានអាជ្ញាធរអប្សរាជាដើមបណ្ដឹង។
ហេតុការណ៍ ពលរដ្ឋលើកគ្នាមកការពារតំណាងរបស់ពួកគាត់នៅមុខតុលាការខេត្តសៀមរាប នោះធ្វើឡើងនៅព្រឹកថ្ងៃទី២២ ខែសីហា ឆ្នាំ២០១៤នេះ។
ទំនាស់ដីធ្លីដ៏រ៉ាំរ៉ៃមួយរវាងអ្នកភូមិ តានី,ស្គន់,ត្បែងលិច,ត្បែងកើត,ស្នាសង្គ្រាម,នៃ ស្រុកបន្ទាយស្រី ជាមួយអាជ្ញាធរអប្សរា បានកើតឡើងអស់រយៈពេលជិត១០ឆ្នាំមកហើយរហូតមកដល់បច្ចុប្បន្ននេះ នៅតែមិនទាន់ មានដំណោះស្រាយណាមួយនៅឡើយ ប៉ុន្តែជាក់ស្តែងនៅព្រឹកថ្ងៃទី២២ខែសីហានេះ ពលរដ្ឋមានការភ័យខ្លាចស្ថាប័នតុលាការធ្វើការចោទប្រកាន់មកលើតំណាង របស់ពួកគាត់ពីបទព្រហ្មទណ្ឌដូចដែលអាជ្ញាធរអប្សរាបានប្តឹងនោះមែន ប៉ុន្តែធាតុពិតរឿងនេះជារឿងទំនាស់ដីធ្លីប៉ុណ្ណោះ។
សូមរំលឹកថា តំណាងពលរដ្ឋក្នុងសហគមន៍ដែលត្រូវកោះហៅមកសួរនាំនៅតុលាការចំនួន៧រូបមានទី១/ឈ្មោះ ហួន ហ៊ុំ ទី២/ ឈ្មោះ ញឹម សួន ទី៣/ ឈ្មោះ តែម សាល់ ទី៤/ ឈ្មោះ ទូច ទួន ទី៥ / ឈ្មោះ សុត ប៉ុន ទី៦/ ឈ្មោះ ទឹន ពួន និង ទី៧/ ឈ្មោះ ហុប ទូច។
តំណាង ពលរដ្ឋម្នាក់ឈ្មោះ ហួន ហ៊ុំ បានរៀបរាប់បានប្រាប់អ្នកកាសែតនៅមុខអាគារតុលាការបន្ទាប់ពីគាត់ ចេញពីសវនាការថា បច្ចុប្បន្ននេះតុលាការមិនទាន់សម្រេចទោសមកលើពួកគាត់ទេ ដោយបង្អង់រយៈពេល២ខែទៀត ដើម្បីឲ្យពួកគាត់ទៅដាក់ពាក្យបណ្តឹងព្រោះរឿងនេះជារឿងទំនាស់ ដីធ្លីសុទ្ធសាធ។ កន្លងមកអាជ្ញាធរអប្សរាបានចុះទៅទិញដីពីពួកគាត់ក្នុងតម្លៃទាបពេក ហើយពួកខ្ញុំក៏ឲ្យអាជ្ញាធរអប្សរាដោះស្រាយជាផ្លូវដីឲ្យចំនួន៣៨ គ្រួសារ ប៉ុន្តែអាជ្ញាធរអប្សរាបានចុះទៅវាស់ដីឲ្យពួកគាត់បានតែ១៣គ្រួសារ តែប៉ុណ្ណោះ ដូច្នេះពួកគាត់មិនអាចទទួលយកនូវដំណោះស្រាយរបស់អាជ្ញាធរអប្សរាបានទេ ព្រោះអីយើងខ្ញុំទាំងអស់គ្នាជាអ្នករស់នៅក្នុងភូមិទាំងនេះជាយូរ យាណាស់មកហើយដោយមិនមែនជាជនចំណាកស្រុកអ្វីនោះទេ ។
លោករៀបរាប់បន្តទៀតថា ដោយឃើញប្រជាពលរដ្ឋកើតទុក្ខមិនសុខចិត្តនាំគ្នាតវ៉ាយ៉ាងដូច្នេះ អាជ្ញាធរអប្សរាបានបង្វែរសំណុំរឿងទំនាស់ដីធ្លីទៅជារឿងព្រហ្មទណ្ឌ វិញ ទើបធ្វើឲ្យប្រជាពលរដ្ឋមានការភ័យខ្លាច នឹង ការបាត់បង់ដីធ្លីផង និង ភ័យខ្លាចជាប់គុកផង។ លោក បន្តថា ដីដែលប៉ះពាល់ទាំងអស់មានចំនួន១០១២ហិកតាដែលអាជ្ញាធរអប្សរាប្រមូល ទិញពីប្រជាពលរដ្ឋសម្រាប់ទុកចែកឲ្យអ្នករស់នៅតាមមាត់ស្ទឹងសៀមរាប។
ក្រុម ប្រជាពលរដ្ឋដែលនាំគ្នាមកមុខតុលាការដើម្បីរង់ចាំស្តាប់សវនាការនេះ បានទទូចសុំឲ្យស្ថាប័នតុលាការជួយរកយុត្តិធម៌ឲ្យពួកគាត់ដែលជា ពលរដ្ឋរស់នៅក្នុងភូមិចំនួន៥នៃស្រុកបន្ទាយស្រីផង។
ជុំវិញ ករណីខាងលើនេះដែរ អ្នកយកព័ត៌មានមិនអាចស្វែងរកសុំការបំភ្លឺពីលោក ប៊ុន ណារិទ្ធ អគ្គនាយកអាជ្ញាធរអប្សរាបានទេនៅព្រឹកនេះ៕