ភ្នំពេញ ៖ បាតុកម្មរបស់សហគមន៍ខ្មែរកម្ពុជាក្រោម ព្រះសង្ឃ និងក្រុមយុវជន អង្គការសមាគមនានា នៅមុខស្ថានទូតវៀតណាម រហូតដល់រសៀលថ្ងៃទី១២សីហានេះ បានឈានដល់ការដុតទង់ជាតិវៀតណាម។ ការដុតទង់ជាតិវៀតណាម បានធ្វើឡើង ខណៈដែលព្រះសង្ឃ និងក្រុមយុវជន សហគមន៍ខ្មែរកម្ពុជាក្រោម បានជួបជុំ តវ៉ាជាថ្មី ចូលដល់ថ្ងៃទី២ហើយ នៅថ្ងៃទី១២សីហានេះ។
ខ្លីបវិដេអូ ដែលព្រះសង្ឃ និងយុវជន បានដុតទង់ជាតិវៀតណាម ត្រូវបានគេបង្ហោះតាមហ្វេសប៊ុក នារសៀលថ្ងៃទី១២សីហា។ មូលហេតុនៃការដុតទង់ជាតិវៀណាម មកពីក្រុមបាតុករ មិនឃើញមន្ត្រីទូតវៀតណាម ចេញមកទទួលញត្តិរបស់បាតុករ ជុំវិញបញ្ហាទឹកដីខ្មែរកម្ពុជាក្រោមនោះទេ។
សហគមន៍ខ្មែរកម្ពុជាក្រោម ព្រះសង្ឃ ក្រុមយុវជន និងអង្គការសមាគមជាច្រើនទៀត បានធ្វើបាតុកម្ម ជាថ្មី ២ រយៈពេលថ្ងៃមកហើយ រហូតដល់ថ្ងៃទី១២សីហានេះ ដើម្បីទាមទារឲ្យអ្នកនាំពាក្យស្ថានទូតវៀតណាម ប្រចាំកម្ពុជា ចេញមកសុំទោស និងទទួលស្គាល់ប្រវត្តិសាស្ត្រពិត ជុំវិញបញ្ហាទឹកដីខ្មែរកម្ពុជាក្រោម។ ផ្លូវនៅមុខស្ថានទូតវៀតណាម តាមផ្លូវព្រះមុនីវង្ស ក្នុងរាជធានីភ្នំពេញ ត្រូវបានប៉ូលិសដាក់របាំងបិទផ្លូវពីរថ្ងៃមកហើយ។
ទឹកដីខ្មែរកម្ពុជាក្រោម ត្រូវបានអ្នកនាំពាក្យស្ថានទូតវៀតណាម ប្រចាំកម្ពុជា លោកត្រឹងវ៉ាន់ថុង លើកឡើងតាមកាសែតថា ជាទឹកដីរបស់វៀតណាមយូរឆ្នាំណាស់មកហើយ មិនមែនទើបតែអាណានិគមបារាំង កាត់ចេញពីទឹកដីកម្ពុជា ប្រគល់ឲ្យវៀតណាមគ្រប់គ្រង នាថ្ងៃទី៤ ខែមិថុនា ឆ្នាំ២០១៤ ដូចអ្វីដែលប្រវត្តិសាស្ត្របានកត់ត្រានោះទេ។
យ៉ាងណាក៏ដោយ ក្នុងបាតុកម្មជាបន្តបន្ទាប់ ចាប់តាំងពីថ្ងៃទី៨កក្កដា និងថ្ងៃទី២១កក្កដា គឺមន្ត្រីស្ថានទូតវៀតណាម បានបដិសេធ មិនចេញមកទទួលញត្តិ ឬក៏បកស្រាយសុំទោសជុំវិញការលើកឡើងរបស់អ្នកនាំពាក្យខាងលើនោះទេ៕