ស្វាយរៀង៖ យោងតាមប្រភពមន្រ្តីរាជការសាខាគយខេត្តស្វាយរៀងបានបង្ហើបឲ្យដឹងថា អំពើពុករលួយរបស់លោក ចាន់ តារា អាចប្រព្រឹត្តទៅយ៉ាងសុខស្រួលក៏មានកិច្ចសហការមួយបក្ខពួករបស់ខ្លួន។
បញ្ហានេះលោក អូន ព័ន្ធមុនីរ័ត្ន រដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ មិនគួរមើលរំលងអំពើពុករលួយតាមច្រើនរូបភាពរបស់លោក ចាន់ តារា ប្រធានការិយាល័យគយច្រកទ្វារអន្តរជាតិព្រៃវល្លិ៍នោះទេ។ ដោយហេតុថាលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានរក្សាភាពស្ងៀមស្ងាត់ បើទោះបីអំពើពុករលួយរបស់លោក ចាន់ តារា មេគយច្រកព្រៃវល្លិ៍ និងអំពើពុករលួយរបស់លោក ហេង សំបូរ ត្រូវបានលាតត្រ ដាងជាបន្តបន្ទាប់ក៏ដោយ។
តាមប្រភពពីមន្ត្រីគយនៅខេត្តស្វាយរៀងបានឲ្យដឹងថា ចាប់តាំងពីទទួលបានតំណែងជាប្រធានការិយាល័យ គយច្រកទ្វារអន្តរជាតិព្រៃវល្លិ៍ ស្រុកកំពង់រោទ៍ ខេត្តស្វាយរៀង កាលពីថ្ងៃទី0៦ ខែកក្កដា ឆ្នាំ២០ ២០ រហូត មក គឺលោក ចាន់ តារា ប្រើតួនាទី និងអំណាចប្រមូលលុយតាម របៀបពុករលួយយ៉ាងពេញ បន្ទុក។ អំពើពុករលួយច្រើនបែបច្រើនយ៉ាងរបស់លោក ចាន់ តារា ប្រធានការិយាល័យគយច្រកទ្វារអន្តរជាតិព្រៃវល្លិ៍ អាចប្រព្រឹត្តទៅយ៉ាងសុខសាន្តមកទល់ពេលនេះគឺមានការបើកដៃពីសំណាក់លោក ហេង សំបូរ ប្រធានសាខាគយខេត្តស្វាយរៀង ដែលជាចៅហ្វាយនាយផងដែរ។ ប្រសិនបើគ្មានការបើកដៃពីលោក ហេង សំបូរ ទេនោះគឺលោក ចាន់ តារា មិនហ៊ានប្រព្រឹត្តអំពើពុករលួយពេញទំហឹងដូចសព្វថ្ងៃនេះឡើយ ហើយត្រូវប្រឈមនឹងការព្រមានជាមិនខាន។
ប្រភពមន្រ្តីពាក់ព័ន្ធនៅច្រកអន្តរ ជាតិព្រៃវល្លិ៍ បានឲ្យដឹងថា បច្ចុប្បន្នលោក ចាន់ តារា បើកដៃឲ្យ ក្រុមឈ្មួញទាំងធំទាំងតូចនាំចូល ទំនិញ គេចពន្ធ និងទំនិញបង់ពន្ធមិនគ្រប់ យ៉ាងពេញបន្ទុកដើម្បីផលប្រយោជន៍ផ្ទាល់ខ្លួនគ្មានញញើតអ្វីទាំងអស់។ ទំនិញដែលឈ្មួញធំៗនាំ ចូលយ៉ាងគំហុកតាមច្រកទ្វារអន្តរជាតិព្រៃវល្លិ៍បង់ពន្ធមិនដល់ ៥០ភាគរយផងទេ ហើយក្រៅពីនេះក្រុមឈ្មួញបែងចែកផលប្រយោជន៍ លើតុក្រោមតុជាមួយលោក ចាន់ តារា យ៉ាងរលូន។ ប្រភពបានបង្ហើបឲ្យដឹងទៀតថា ក្រុមឈ្មួញរត់ពន្ធទំនិញចូលទៅស្រុកយួនតាមច្រករបៀងក្បែរៗច្រកទ្វារអន្តរជាតិព្រៃវល្លិ៍ ក៏ជាប្រភពចំណូលរបស់លោក ចាន់ តារា ផងដែរ ក្នុងខណៈដែលលោក ហេង សំបូរ មេ គយខេត្តស្វាយរៀង រក្សាភាពស្ងៀមស្ងាត់។
ពាក់ព័ន្ធព័ត៌មានខាងលើគេហទំព័រ (www.enn-tv.com)យើងខ្ញុំរងចាំនូវការពន្យល់បកស្រាយពីលោក ចាន់ តារា ប្រធានការិយាល័យគយច្រកទ្វារអន្តរជាតិព្រៃវល្លិ៍និងលោក ហេង សំបូរ មេសាខាគយនិងរដ្ឋាករខេត្តស្វាយរៀង រាល់ម៉ោងធ្វើរការ៕
លោក ចាន់ តារា ប្រធានការិយាល័យគយច្រកព្រៃវល្លិ៍ រងការរិះគន់ពីមហាជនប្រព្រឹត្តអំពើពុករលួយស្រង់ដើមដោយអាងអំណាចលោក ហេង សំបូរ មេសាខាគយខេត្តស្វាយរៀង.!
Filed in: សង្គម