ខេត្តតាកែវ៖ថ្មីៗនេះលោក អ៊ូច ភា អភិបាលនៃគណៈអភិបាលខេត្តតាកែវបានព្រមាននិងចាត់វិធានក្ដៅ ចំពោះចៅហ្វាយស្រុក ក្រុង រូបណា ដែលបណ្ដោយបើកដៃឲ្យឈ្មួញទុច្ចរិតនាំចូលជ្រូក ដោយខុសច្បាប់ពីប្រទេសវៀតណាមតាមច្រករបៀងដឹកកាត់តាមស្រុករបស់ខ្លួន ពិសេសគឺស្រុកជាប់ព្រំដែនការកន្លងមកអាជ្ញាធរស្រុកនិងមន្រ្តីជំនាញតែងតែលំហូរជ្រូកតាមច្រករបៀងនេះតែម្ដង។លោក អ៊ូច ភា បានថ្លែងក្នុងកិច្ចប្រជុំបន្ទាន់មួយស្ដីពីការត្រួតពិនិត្យ និងទប់ស្កាត់ការឆ្លងរាលដាលជំងឺ ប៊េស្ដជ្រូកអាហ្វ្រិកនៅប្រទេសវៀតណាម។
នៅរសៀលថ្ងៃទី២២ ខែមីនា ឆ្នាំ២០១៩ថ្មីៗកន្លងទៅនេះនៅសាលប្រជុំសាលាខេត្តតាកែវ លោក អ៊ូច ភា អភិបាលខេត្តបានថ្លែងនៅចំពោះមុខចៅហ្វាយស្រុក ក្រុង និង មន្ត្រីជំនាញពាក់ព័ន្ធថាប្រសិនបើលោកពិនិត្យឃើញថា មានអាជ្ញាធរមូលដ្ឋានណា មានការពាក់ព័ន្ធទៅនឹងករណីនាំសត្វជ្រូកចូលតាមច្រក របៀងណាមួយដោយខុសច្បាប់នោះគឺចៅហ្វាយស្រុកនោះជាអ្នកទទួលខុសត្រូវចំពោះមុខច្បាប់ជាពិសេសអាចនឹងត្រូវដកតំណែងចេញតែម្តង។
លោក អភិបាលខេត្តតាកែវ បានបន្តថា ចំពោះសត្វជ្រូកដែលនាំចូលតាមច្រកព្រំដែនគឺត្រូវតែនាំចូលតាមច្រកទ្វារអន្តរជាតិភ្នំដិនតែមួយគត់ ដើម្បីធានាបានសុខភាពសុវត្ថិភាព និងភាពស្របច្បាប់របស់ឈ្មួញទាំងនេះជាពិសេសមិនធ្វើឲ្យបាត់បង់ចំណូលពន្ធគយ ដែលជាការធ្វើឲ្យជួយលើកស្ទួយសេដ្ឋកិច្ចជាតិថែមបានមួយកម្រិតទៀតផង។
លោក អ៊ូច ភា អភិបាលខេត្តតាកែវ បានបន្ថែមហើយបញ្ជាក់ថាប្រសិនបើឃើញឡានដឹកជ្រូក ដែលឆ្លងកាត់ច្រករបៀងក្នុងមូលដ្ឋានរបស់ខ្លួនតាមស្រុក ក្រុងណានីមួយៗ នោះអាជ្ញាធរស្រុក ក្រុង នោះត្រូវ តែឃាត់ទុករថយន្តដឹកជ្រូកនេះ ហើយឆែកមើលឯកសារពាក់ព័ន្ធ ថា តើមានអាជ្ញាប័ណ្ណត្រឹមត្រូវដែលចេញពីក្រសួងកសិកម្មដែរឬទេ? បើការដឹកជ្រូកចូលនោះមិនស្របច្បាប់ទេ ត្រូវរកមុខអ្នកដែលអនុញ្ញាឲ្យឃើញ ដើម្បីចាត់វិធានការតាមនីតិវិធីច្បាប់។
លោក អភិបាលខេត្តតាកែវបានបន្ថែមទៀតថា ប្រសិនអាជ្ញាធរមូលដ្ឋាន ស្រុក ក្រុង ណាដែលចាប់បានឡានដឹកជ្រូក ខុសច្បាប់នៅក្នុងមូលដ្ឋានរបស់ខ្លួននោះលោកឧបត្ថម្ភថវិកាលើកទឹកចិត្តចំនួន១លានរៀលពីលោកអភិបាលខេត្តដោយផ្ទាល់។
មហាជននានារងចាំមើលថាតើបទបញ្ជាលោកអភិបាលខេត្តតាកែវមានប្រសិទ្ធភាពប៉ុណ្ណាបើមន្រ្តីក្រោមឱវាទរបស់លោកមួយចំនួនដូចមន្រ្តីគ្រាប់ល្ពៅស្ងោនឹង៕