កំពត៖ប្រភពពីមន្ត្រីនៅច្រកទ្វារអន្តរជាតិព្រែកចាកស្រុកកំពង់ត្រាច ខេត្តកំពតបានឲ្យដឹងថាលោកយីថុលដែលមកកាន់តំណែងជាប្រធាន ការិយាល័យគយច្រកព្រែកចាកកាលពីពេលថ្មីៗកន្លងនេះកំពុងប្រើអំណាចរបៀបពុករលួយប្រមូលលុយធ្វើមានធ្វើបានផ្ទាល់ខ្លួនយ៉ាងគឃ្លើនគ្មានញញើតអ្វីទាំងអស់។ ប្រភពបានឲ្យដឹងទៀតថាលោកយីថុលបានយកបទពិសោធន៍នៃអំ ពើពុករលួយកាលធ្វើជាមេគយនៅច្រក៤០០ស្រុកសំឡូតខេត្តបាត់ ដំបងមកអនុវត្តន៍នៅច្រកទ្វារអន្តរជាតិព្រែកចាកស្រុកកំពង់ត្រាច ខេត្តកំពត យ៉ាងគឃ្លើនបំផុត។បើតាមការអះអាងប្រភពពីក្រុមឈ្មួញនិងអាជីវករតូចតាចដែលរកស៊ីនាំចូលទំនិញតិចតួចពីស្រុកយួនតាមច្រកទ្វារអន្តរជាតិព្រែកចាកបានឲ្យដឹងថាបច្ចុប្បន្នលោកយីថុលមេគយច្រកព្រែកចាកនិងបក្ខពួកឈ្មោះ រស់សាតព្រមទាំងមន្រ្តី២នាក់ទៀតកំពុងគៀបយកលុយពីពួកគាត់យ៉ាងកំរោល។ ក្រុមឈ្មួញនិងអាជីវករតូចតាចបានបញ្ជាក់ថាមុខរបររបស់ពួកគាត់សព្វថ្ងៃនេះស្ទើរតែគ្មានសល់កម្រៃសម្រាប់ទិញអង្ករច្រកឆ្នាំងព្រោះលោកយីថុលនិងបក្ខពួកគៀបយកលុយលើតុក្រោមតុច្រើនពេក។ ដូច្នេះហើយទើបពួកគាត់អំពាវនាវឲ្យលោកអូនព័ន្ធមុនីរ័ត្នដែលជារដ្ឋមន្ត្រី ក្រសួងហិរញ្ញវត្ថុនិងលោកគុណញឹមជាមេគយធំៗចាត់វិធានការទប់ស្កាត់នូវអំពើពុករលួយរបស់លោកយីថុលនិងបក្ខពួកជាបន្ទាន់កុំឲ្យពួកគេធ្វើអ្វីៗតាមអំពើចិត្តតទៅទៀត។
រយៈពេលប៉ុន្មានថ្ងៃកន្លងទៅនេះរឿងអាស្រូវរបៀបពុករលួយរបស់លោក យីថុលប្រធានការិយាល័យគយនិងរដ្ឋាករច្រកទ្វារអន្តរជាតិព្រែកចាក ស្រុកកំពង់ត្រាចខេត្តកំពតត្រូវបានក្រុមឈ្មួញនិងអាជីវករដែលនាំចូល ទំនិញ តាមច្រកនេះបើកក៍កាយជាបន្តបន្ទាប់។ ក៏ប៉ុន្តែរហូតមកដល់ពេលនេះថ្នាក់ដឹកនាំក្រសួងសេដ្ឋកិច្ចនិងហិរញ្ញវត្ថុក៏ ដូចជាលោកគុណញឹមអគ្គនាយកនៃអគ្គនាយកដ្ឋានគយនិងរដ្ឋាករកម្ពុជា មិនទាន់ចាត់វិធានការទប់ស្កាត់អំពើរបៀបពុករលួយរបស់លោកយីថុល នៅឡើយទេ។ ប្រការនេះហើយដែលធ្វើឲ្យលោកយីថុលនៅតែបន្តប្រើតួនាទីនិងអំណាចរបស់ខ្លួនប្រមូលលុយតាមរបៀបពុករលួយដោយគ្មានញញើតអ្វីទាំងអស់ ព្រោះអាងមានខ្នងបង្អែករឹងមាំ។
ប្រភពពីមន្ត្រីនិងភ្នាក់ងារគយតូចតាចក្នុងខេត្តកំពតមួយចំនួនបានបង្ហើប ឲ្យដឹងថាលោកយីថុលកំពុងប្រព្រឹត្តតាមរបៀបអំពើពុករលួយតាមច្រើនរូបភាពគៀបយកលុយពីក្រុមឈ្មួញនិងអាជីវករតូចតាចដោយពុំមានការ យោគយល់ឡើយ។ ប្រភពខ្លះបានបង្ហើបថាលោកយីថុលបានឃុបឃិតឲ្យឈ្មួញធំៗនាំចូលទំនិញគេចពន្ធទំនិញខុសច្បាប់និងទំនិញបង់ពន្ធមិនគ្រប់នាំចូលកាន់តែច្រើនឡើងៗក្នុងមួយខែៗធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើន។ប្រភពបានឲ្យដឹងថាសូម្បីតែទឹកស៊ុបក៏លោកយីថុលឃុបឃិតឲ្យឈ្មួញនាំចូលតាមច្រកទ្វារអន្តរជាតិព្រែកចាកដោយមិនគិតពីផលប៉ះពាល់ដល់សុខភាពប្រជាពលរដ្ឋខ្មែរនោះទេគឺគិតតែផលប្រយោជន៍ផ្ទាល់ខ្លួន។
ប្រភពដែលស្និទ្ធនឹងលោកយីថុលមេគយច្រកព្រែកចាកបានឲ្យដឹងថាលោកយីថុលអាចធ្វើអ្វីៗតាមអំពើចិត្តរបស់ខ្លួនគឺដោយសារមានការ ឃុបឃិតបើកដៃពីសំណាក់លោកហេងសំបូរដែលជាប្រធានសាខាគយនិងរដ្ឋាករខេត្តកំពត ផងដែរ។ ប្រសិនបើគ្មានការឃុបឃិតបើកដៃពីសំណាក់លោកហេងសំបូរប្រភព សាខាគយនិងរដ្ឋាករទេនោះគឺលោកយីថុលនិងបក្ខពួកបរិវារមិនហ៊ានប្រើតួនាទីនិងអំណាចរបស់ខ្លួនឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់យ៉ាងពេញបន្ទុកដូចសព្វថ្ងៃនេះឡើយ។ពាក់ព័ន្ធនូវការរិះគន់ខាងលើគេហទំព័រ(www.enn-tv.com)យើងមិនអាចសុំការពន្យល់បកស្រាយពីរលោកហេងសំបូរប្រធានសា ខាគយនិងរដ្ឋាករខេត្តកំពតនិងលោកយីថុលប្រធានការិយាល័យគយ ច្រកទ្វារអន្តរជាតិព្រែកចាកនិងបក្ខពួកបាននោះទេ៕
