មណ្ឌលគិរីៈនៅថ្ងៃទី១២ខែកុម្ភះឆ្នាំ២០១៩តាមប្រភពពីប្រជាពលរដ្ធនឹងមន្ត្រីរដ្ធបាលព្រៃឈើនិងសកម្មជនព្រៃឈើក្នុងខេត្តរតនគិរីបានបង្ហើបឲ្យដឹងថារយៈពេលប៉ុន្មានយប់កន្លងទៅនេះគឺក្នុងមួយយប់ៗមេឈ្មួញធំៗសម្រុកដឹកជញ្ជូនឈើចេញពីខេត្តមណ្ឌលគិរីតាមរថយន្តតូចធំរាប់រយគ្រឿងយ៉ាងរលូន។
ប្រភពបានឲ្យដឹងទៀតថាលោកអ៊ុំវណ្ណសុភគ៌នាយខណ្ឌរដ្ឋបាលព្រៃ ឈើខេត្តមណ្ឌលគិរីនិងសមត្ថកិច្ចពាក់ព័ន្ធដទៃទៀតមិនហ៊ានប៉ះពាល់ក្រុមឈ្មួញដែលបង្កើនសកម្មភាពដឹកជញ្ជូនឈើចេញទៅស្រុកយួននិងដឹកជញ្ជូនឈើចេញទៅបណ្ដាខេត្តផ្សេងៗទៀតយ៉ាងគគ្រឹកគគ្រេងនោះទេ។ សូម្បីតែលោកស្វាយសំអ៊ាងចៅហ្វាយខេត្តមណ្ឌលគិរីនិងលោកឧត្តម សេនីយ៍ទោឡោសុខាស្នងការនគរបាលខេត្តមណ្ឌលគិរីក៏រក្សាភាពស្ងៀមស្ងាត់ផងដែរក្នុងខណៈដែលមេឈ្មួញខ្មែរនិងមេឈ្មួញយួនច្រើននាក់បន្តសកម្មភាពដឹកជញ្ជូនឈើចេញពីខេត្តមណ្ឌលគិរីយ៉ាងពេញបន្ទុក។
តាមសេចក្ដីរាយការណ៍ពីប្រជាសហគមន៍ការពារព្រៃឈើក្នុងស្រុកកោះញែកបានឲ្យដឹងថាបច្ចុប្បន្នមេឈ្មួញធំៗជាច្រើននាក់ដូចជាឧកញ៉ា សឹងសំអុលនិងឧកញ៉ាតុបវីដាជាដើមនៅតែបន្តសកម្មភាពកាប់ឈើដឹកជញ្ជូនឈើចេញពីតំបន់ដែនជម្រកសត្វព្រៃភ្នំព្រេចនិងតំបន់ដែន ជម្រកសត្វព្រៃស្រែពក ដោយគ្មានញញើតអ្វីទាំងអស់។ ប្រជាសហគមន៍ការពារព្រៃឈើក្នុងស្រុកកោះញែកបានឲ្យដឹងទៀតថា មន្ត្រីជំនាញនិងសមត្ថកិច្ចពាក់ព័ន្ធក្នុងស្រុកកោះញែកគឺជាអ្នកឃុបឃិតឲ្យមេឈ្មួញធំៗកាប់ឈើដឹកចេញពីតំបន់ព្រៃការពារព្រៃអភិរក្សនិងព្រៃសហគមន៍ក្នុងស្រុកកោះញែកដើម្បីជាថ្នូរនឹងផលប្រយោជន៍យ៉ាងសុខស្រួល។
មានន័យថាបទបញ្ជារបស់លោកស្វាយសំអ៊ាងចៅហ្វាយខេត្តមណ្ឌលគិរី ក្នុងការទប់ស្កាត់បទល្មើសបំផ្លាញព្រៃឈើកំពុងក្លាយទៅជារឿងឥតន័យ ព្រោះមេឈ្មួញធំៗដូចជាមេឈ្មួញសឹងសំអុលនិងមេឈ្មួញតុបវីដាមេឈ្មួញប៉ោសំអឿនបន្តឃុបឃិតគ្នាបំផ្លាញព្រៃឈើក្នុងស្រុកកោះញែក ដោយគ្មានខ្លាចក្រែងអ្វីទាំងអស់។
បើតាមប្រភពពីមន្ត្រីនគរបាលនៅក្នុងស្នងការដ្ឋាននគរបាលខេត្ត មណ្ឌលគិរីមួយចំនួនបានបង្ហើបឲ្យដឹងថារហូតមកដល់ពេលនេះមេ ឈ្មួញគួយសុឃុនដែលជាមន្ត្រីនគរបាលខេត្តនិងជាប្អូនប្រុសរបស់លោក ស្វាយសំអ៊ាងចៅហ្វាយខេត្តមណ្ឌលគិរីនៅតែបន្តសកម្មភាពដឹកជញ្ជូនឈើចេញទៅស្រុកយួនយ៉ាងពេញបន្ទុក។
ទន្ទឹមនឹងនេះប្រភពខ្លះបានឲ្យដឹងថាលោកឡោសុខាស្នងការនគរបាលខេត្តមណ្ឌលគិរីគ្មានឆន្ទៈក្នុងការទប់ស្កាត់បទល្មើសដឹកជញ្ជូនឈើចេញទៅស្រុកយួននោះទេហើយស្នងការរងនគរបាលខេត្តមណ្ឌលគិរី ម្នាក់ឈ្មោះកែវចិន្ដាហៅធូក៏ជាប់ពាក់ព័ន្ធទៅនឹងបទល្មើសដឹកជញ្ជូនឈើចេញទៅស្រុកយួនដែរ។ ប្រការនេះកំពុងធ្វើឲ្យព្រៃឈើដែលនៅសេសល់ក្នុងស្រុកកោះញែក ស្រុកកែវសីមាស្រុកអូររាំងនិងស្រុកពេជ្រាដាខេត្តមណ្ឌលគិរីចៀសមិនផុតពីសេចក្ដីវិនាសសាបសូន្យឡើយព្រោះក្រុមឈ្មួញធំៗនៅតែដឹកជញ្ជូនឈើចេញពីខេត្តមណ្ឌលគិរីយ៉ាងពេញបន្ទុកដោយគ្មានខ្លាចក្រែងអ្វីទាំងអស់ ៕
