បន្ទាយមានជ័យៈសេចក្ដីរាយការណ៍ពីសមត្ថកិច្ចពាក់ព័ន្ធបានឲ្យដឹង ថារហូតមកដល់ពេលនេះប្រធានមន្ទីរបរិស្ថានខេត្តបន្ទាយមានជ័យ ក៏ដូចជាប្រធានមន្ទីរកសិកម្មខេត្តបន្ទាយមានជ័យមិនទាន់ចាត់វិធាន ការទប់ស្កាត់ករណីក្រុមឈ្មួញដឹកជញ្ជូនធ្យូងចេញទៅស្រុកសៀម រាប់រយតោនក្នុងមួយ ថ្ងៃៗនោះទេ។ ជាងនេះទៅទៀតលោកសួនបវរអភិបាលខេត្តបន្ទាយមានជ័យសម្ងំ ស្ងៀមធ្វើមិនដឹងមិនឮអ្វីទាំងអស់ក្នុងខណៈដែលព្រៃឈើដែលនៅសេសសល់ក្នុងខេត្តបន្ទាយមានជ័យនិងខេត្តឧត្ដរមានជ័យកំពុងប្រ ឈមនឹងសេចក្ដីវិនាសនាពេលឆាប់ ៗខាងមុខនេះ។ ដូច្នេះលោកសាយសំអាល់រដ្ឋមន្ត្រីក្រសួងបរិស្ថានក៏ដូចជាលោកវេង សាខុនរដ្ឋមន្ត្រីក្រសួងកសិកម្មគួរពិនិត្យឡើងវិញចំពោះបញ្ហាខាងលើ នេះព្រោះសកម្មភាពក្រុមឈ្មួញដឹកជញ្ជូនធ្យូងចេញទៅស្រុកសៀម តាមច្រកតំបន់បឹងត្រកួននិងច្រករបៀងប្រាសាទត្បែងកំពុងធ្វើឲ្យព្រៃ ឈើនៅសេសសល់ក្នុងខេត្តបន្ទាយមានជ័យនិងខេត្តឧត្ដរមានជ័យ ប្រឈមនឹងសេចក្ដីវិនាសសាបសូន្យ។
ប្រភពពីប្រជាពលរដ្ឋរស់នៅតាមតំបន់ព្រំដែនខ្មែរ-សៀមក្បែរច្រកបឹងត្រកួនបានឲ្យដឹងថារហូតមកដល់ពេលនេះនៅតែមានឈ្មួញមួយ ចំនួនសម្រុកដឹកជញ្ជូនធ្យូងចេញទៅស្រុកសៀមតាមច្រកបឹងត្រកួន ដោយគ្មានញញើតអ្វីទាំងអស់។ មន្ត្រីនៅច្រកបឹងត្រកួនមួយចំនួនក៏បានឲ្យដឹងដែរថាសមត្ថកិច្ចជាច្រើនស្ថាប័ននៅច្រកតំបន់បឹងត្រកួនគឺជាអ្នកឃុបឃិតឲ្យឈ្មួញដឹកជញ្ជូនធ្យូងចេញទៅស្រុកសៀមរាប់រយតោនក្នុងមួយថ្ងៃៗដើម្បីជាថ្នូរនឹងផល ប្រយោជន៍ ហើយមិនខ្វល់ពីការរិះគន់អ្វីទាំងអស់។ បញ្ហានេះកំពុងធ្វើឲ្យព្រៃឈើដែលនៅសេសសល់ក្នុងខេត្តឧត្ដរមាន ជ័យនិងខេត្តបន្ទាយមានជ័យត្រូវប្រឈមនឹងសេចក្ដីវិនាសព្រោះលោក សួនបវរអភិបាលខេត្តបន្ទាយមានជ័យនិងប្រធានមន្ទីរពាក់ព័ន្ធក្នុងខេត្តបន្ទាយមានជ័យមិនចាត់វិធានការទប់ស្កាត់ករណីក្រុមឈ្មួញដឹក ជញ្ជូនធ្យូងចេញទៅស្រុកសៀមនោះឡើយ។
តាមការបង្ហើបពីក្រុមឈ្មួញរកស៊ីដឹកជញ្ជូនធ្យូងចេញទៅស្រុកសៀម តាមច្រកតំបន់បឹងត្រកួនបានឲ្យដឹងថាប្រសិនបើគ្មានការឃុបឃិតបើកដៃពីសំណាក់លោកញឹកប៊ុនលេខប្រធានការិយាល័យគយច្រកបឹងត្រកួននិងសមត្ថកិច្ចពាក់ព័ន្ធដទៃទៀតទេនោះគឺពួកគេមិនអាចដឹកជញ្ជូនធ្យូងចេញទៅស្រុកសៀមបានឡើយ។ ក្នុងចំណោមឈ្មួញដែលដឹកជញ្ជូនធ្យូងចេញទៅស្រុកសៀមតាម ច្រកបឹងត្រកួនច្រើនជាងគេគឺឈ្មួញឈ្មោះបារាំងហើយបច្ចុប្បន្នឈ្មួញម្នាក់នេះសម្រុកដឹកជញ្ជូនធ្យូងចេញទៅស្រុកសៀមតាមច្រករបៀងប្រាសាទត្បែង ក្នុងឃុំបន្ទាយឆ្មារ ជិតជើងភ្នំដងរែកផងដែរ។ ឈ្មួញឈ្មោះបារាំងត្រូវបានគេដឹងថាមានទំនាក់ទំនងជិតស្និទ្ធជាមួយសមត្ថកិច្ចនៅច្រកបឹងត្រកួនក៏ដូចជាសមត្ថកិច្ចនៅច្រករបៀងប្រាសាទត្បែងទើបអាចធ្វើសកម្មភាពដឹកជញ្ជូនធ្យូងចេញទៅស្រុកសៀមបានដោយសេរី៕