ភ្នំពេញ៖ អាជ្ញាធរថ្នាក់សង្កាត់ ប៉ូលីសប៉ុស្តិ៍ គឺជាអ្នកដើរតួនាទីយ៉ាងសំខាន់ ក្នុងការធ្វើសកម្មភា ព ដើម្បីធ្វើយ៉ាងណាអោយក្នុងមូលដ្ឋានរបស់យើងគ្មានផ្សែងបារី និងមានបរិស្ថានល្អ ។ បើមានបរិស្ថានល្អហើយនោះ ការអភិវឌ្ឍភូមិដ្ឋានក៏ដូចជាការអភិវឌ្ឍប្រទេសជាតិក៏មានការរីកចំរើនលឿនទៅតាមនោះផងដែរ។
នេះបើយោងតាមការអោយដឹងពី លោកឯក ឃុនដឿន អភិបាលខណ្ឌទួលគោកក្នុងឱកាសដែលលោកបានអញ្ជើញជាអធិតី ក្នុងវគ្គបំប៉នស្តីពីការអនុវត្តបរិស្ថានគ្មានផ្សែងបារី ដែលបានធ្វើឡើងកាលពីព្រឹកថ្ងៃទី១៤ ធ្នូនៅសាលាខណ្ឌទួលគោក ។
លោកឯក ឃុនដឿន បានមានប្រសាសន៍ថា វគ្គបំប៉នស្តីពីការអនុវត្តបរិស្ថានគ្មានផ្សែងបារី ធ្វើឡើងក្នុងគោលបំណង ធ្វើយ៉ាងណាអោយភូមិដ្ឋានរបស់យើងគ្មានផ្សែងបារី និងមានបរិស្ថានល្អ ពិសេសគឺជម្រុញអោយអាជ្ញាធរសង្កាត់ ប៉ូលីសមូលដ្ឋានជួយ ផ្សព្វផ្សាយអោយប្រជាពលរដ្ឋ ក្នុងមូលដ្ឋានរបស់ខ្លួនបានយល់ពីផលប៉ះពាល់នៃផ្សែងបារី និងនៅអោយឆ្ងាយពីផ្សែងបារី ។
លោកឯក ឃុនដឿន បានបន្តទៀតថា អ្នកជក់បារីច្រើន ធ្វើអោយប៉ះពាល់ដល់សុខភាពខ្លួនឯងនិងអ្នកនៅជុំវិញខ្លួនយ៉ាងខ្លាំង ព្រមទាំងបានធ្វើអោយប៉ះពាល់បរិស្ថានកាន់តែខ្លាំងផងដែរ ខណៈដែលពិភពលោកយើងទាំងមូលកំពុងតែរួមគ្នាដើម្បីបំបាត់ផ្សែងបារី និងធ្វើអោយបរិស្ថានបានប្រសើរឡើងនោះ។
លោកឯក ឃុនដឿន បានបញ្ជាក់ថា នៅក្នុងមូលដ្ឋានខណ្ឌទួលគោកទាំងមូលលោកចង់អោយ ទីកន្លែងសប្បាយភាពមួយចំនួនដូចជា ក្លឹបកំសាន្ត ភោជនីយដ្ឋាន ជាដើម រៀបចំកន្លែងមូយសម្រាប់អ្នកជក់បារី ដើម្បីកុំអោយប៉ះពាល់សុខភាពដល់អ្នកដែលមិនជក់និងអ្នកនៅក្បែរខ្លួន ។
គួរបញ្ជាក់ផងដែរថា កម្មវិធីខាងលើនេះ ក្រោយពីបញ្ចប់នៅសាលាខណ្ឌសិក្ខាកាមក៏បានចុះទៅពិនិត្យនៅតាមទីតាំងអាជីវកម្មមួយចំនួននៅក្នុងមូលដ្ឋានខណ្ឌទួលគោកផងដែរ ដើម្បីជម្រុញអោយពួកគាត់ជាម្ចាស់អាជីវកម្មរួមសហការជាមួយអាជ្ញាធរ ដើម្បីធ្វើយ៉ាងណាអោយក្នុងមូលដ្ឋានរបស់យើងគ្មានផ្សែងបារី និងមានបរិស្ថានល្អ ៕
