ខេត្តតាកែវ ៖ នាព្រឹកថ្ងៃទី០៧ ខែសីហា ឆ្នាំ២០១៧ នៅសាលប្រជុំផែនការវិនិយោគ ខេត្តតាកែវ មានពិធីប្រកាសចូលកាន់ តំណែងប្រធានមន្ទីររៀបចំដែនដីនគ រូបនីយកម្មសំណង់និងសុរិយោដី ខេត្តតាកែវថ្មីជំនួសប្រធានមន្ទីរចាស់ដែលត្រូវផ្ទេរភារៈកិច្ចទៅជាអនុប្រធាននាយ កដ្ឋានអភិរក្សសុរិយោដីនគររូបនីយកម្ម សំណង់និងសុរិយោដី។
ពិធីនេះដែរស្ថិតក្រោមអធិបតិយភាពលោក ឆាន់ សាផាន រដ្ឋលេខាធិការក្រសួង រៀបចំដែនដី នគររូបនីយកម្ម សំណង់ និងសុរិយោដី លោក យស ណាស៊ី អភិបាលរងខេត្តតាកែវនិងមន្ត្រីនៃមន្ទីរអង្គភាពជុំវិញខេត្តផងដែរ។
ថ្លែងនៅចំពោះមុខគណៈអធិបតិយនាឱកាសនោះផងដែរលោក នួន សុធា ដែលត្រូវបានរាជរដ្ឋាភិបាលតែងតាំងជាប្រធានមន្ទីរថ្មីបានប្តេជ្ញាថា និងខិតខំបំពេញភារៈកិច្ចតាម តួនាទីឲ្យបានល្អ ពិសេសនិងអនុវត្តតាម ការណែរនាំនិងគោរពតាមគោលនយោបាយថ្នាក់ដឹកនាំឲ្យបានយ៉ាងម៉ត់ចត់ជាទីបំផុត។
ចុងបញ្ចប់នាពិធីនោះដែរ លោក ឆាន់ សាផាន រដ្ឋលេខាធិការក្រសួង រៀបចំដែនដី នគររូបនីយកម្មសំណង់និងសុរិយោដី ដែលជាគណៈអធិបតិយបានផ្តាំផ្ញើដល់ប្រធានមន្ទីរថ្មីធ្វើយ៉ាងណាត្រូវបម្រើសេវាសាធារណៈជូនប្រជាពលរដ្ឋឲ្យបានល្អនិងទាន់ពេលវេលាទៅលើជំនាញរបស់ខ្លួន ជាពិសេសសាមគ្គីភាពផ្ទៃក្នុងនៅអង្គភាពខ្លួនត្រូវតែមានជានិច្ចដើម្បីទទួលបានភាពជោគជ័យនិងសេចក្តីទុកចិត្តពីប្រជាពលរដ្ឋ ៕