ភ្នំពេញ៖ អភិបាលរាជធានីភ្នំពេញឯកឧត្តម ឃួង ស្រេងនៅក្នុងពិធីតែងតាំងផ្លាសប្ដូរអភិបាលខណ្ឌច្បាអំពៅ បានណែនាំទៅអភិបាលខណ្ឌទាំង១២ ត្រូវទទួលទូរស័ព្ទពីប្រជាពលរដ្ឋ នៅពេលដែលពួកគាត់ហៅទូរស័័ព្ទចូល មិនត្រូវរើសអើងនោះទេ ដើម្បីចូលរួមដោះស្រាយបញ្ហាដែលកើតមានចំពោះពួកគាត់មិនត្រូវរើសអើងឃើញលេខទូរស័ព្ទមិនល្អមិនលើក។
ឯកឧត្តមឃួង ស្រេង បានបញ្ជាក់ថា ធ្វើជាមន្ត្រីសាធារណៈ កុំរើសអើងចំពោះការហៅចូលទូរស័ព្ទពីប្រជាពលរដ្ឋនេះជា ចំណុចសំខាន់ណាស់ បើអត់ព័ត៌មាននេះ បើទោះជាសាមគ្គីមក តែអត់មានព័ត៌មាន មិនដឹងទៅធ្វើអីបានទេ ពីព្រោះអត់ទទួលបានអ្វី ថ្មីសោះ អត់ទទួលបានពាក្យបណ្តឹង ទូរស័ព្ទសុទ្ធតែមើលលេខ ឃើញលេខអត់ល្អ អត់លើក នេះជាចំណុចមួយដែលត្រូវតែលុបបំបាត់ៗ ធ្វើជាមន្ត្រីសាធារណៈ ធ្វើអ្នកបម្រើរាស្ត្រ បើរាស្ត្រតេមិនលើកបម្រើតាមរបៀបមិច ចឹងទេសូមខណ្ឌទាំង១២ មិនថាតែអភិបាលខណ្ឌ ថ្មីនេះទេ ត្រូវកែចំពោះបញ្ហានេះទាំងអស់គ្នា។
ឯកឧត្តមឃួងស្រេងថ្លែងណែនាំដល់មន្ត្រីរបស់ខ្លួនខាងលើនេះ បានធ្វើឡើងនៅព្រឹកថ្ងៃទី២៨ខែកក្កដាឆ្នាំ២០១៧នេះនៅក្នុងពិធីប្រកាសតែងតាំងលោក ចេង មុនីរ៉ា ជាអភិបាលខណ្ឌច្បារអំពៅ ជំនួសលោក អ៊ាង ស៊ីផាន ដែលត្រូវចាត់ឲ្យទៅប្រើការងារនៅសាលារាជធានីភ្នំពេញ។
ជាមួយគ្នានេះឯកឧត្តមឃួងស្រេងអភិបាលរាជធានីភ្នំពេញ ក៏បានបញ្ជាក់ផងដែរថា ក្នុងពេលបន្តិចទៀតសាលារាជធានីភ្នំពេញ នឹងបង្កើតនូវ Hotline មួយ ដើម្បីទទួលពាក្យបណ្តឹងចាំបាច់ចំពោះមុខដែលកើតឡើងជាប្រចាំ នៅក្នុងជីវភាពរស់នៅ ប្រចាំថ្ងៃរបស់ប្រជាពលរដ្ឋ និងទទួលយកទៅចាត់ការឲ្យទាន់ពេលវេលា។
ឯកឧត្តមឃួងស្រេងអភិបាល រាជធានីភ្នំពេញក៏បានសំណូមពរដល់អាជ្ញាធរខណ្ឌទាំង១២ សង្កាត់ទាំង១០៥ ក្នុងរដ្ឋបាលរាជធានីភ្នំពេញ ធ្វើកិច្ចការងារបម្រើសេវាសាធារណៈជូនប្រជាពលរដ្ឋដែលប្រមុខរាជរដ្ឋាភិបាលចង់បានបម្រើរាស្ត្រដោយចិត្តស្មោះត្រង៕