បន្ទាយមានជ័យ ៖ ប្រភពពីកូនទាហាន តូច តាចអត់លិឌ្ឍនិងប្រជាពលរដ្ឋរស់នៅតំបន់ អូរបីជាន់បានអោយដឹងថា លោកវរសេនីយ៍ ទោ អ៊ុន ចាន់ មេបញ្ជាការរងកងការពារព្រំដែនលេខ ៥០៣ កំពុងមានចិត្តថ្លេីមពាសមេឃហ៊ានបើកដៃឲ្យក្រុមឈ្មួញជនជាតិថៃនិងក្រុមឈ្មួញផ្សេងទៀត សម្រុកនាំចូលទំនិញគេចពន្ធគ្រប់ប្រភេទ ពីប្រទេសថៃ ចូលមកប្រទេសកម្ពុជា តាមច្រករបៀងព្រំដែនអូរបីជាន់ ដេីម្បីចែកចាយបន្តឲ្យអាជីវករតាមបន្ទាត់ព្រំដែន តាមទីផ្សារក្នុងខេត្តបន្ទាយមានជ័យ និងតាមបណ្តាខេត្តនានា និងឆ្ពោះទៅរាជធានីភ្នំពេញផងដែរ ដោយផ្គើននឹងបទបញ្ជារបស់ថ្នាក់ខេត្ត និងសេចក្តីណែនាំពីក្រសួងមហាផ្ទៃ យ៉ាងគឃ្លើន ។
ប្រភពបន្តថាករណីលោក អ៊ុន ចាន់ អនុវត្តផ្ទុយស្រឡះហាក់មើលស្រាលដល់បទបញ្ជាថ្នាក់ខេត្ត និងសេចក្តីណែនាំរបស់ប្រមុខរាជរដ្ឋាភិបាលកម្ពុជា បានហាមប្រាមបែរជាអនុវត្តផ្ទុយទាំងស្រុង។
គួររម្លឹកថា បទបញ្ជារបស់គណៈបញ្ចាការឯកភាពខេត្ត ក៏ដូចសេចក្តីណែនាំរបស់អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងអនុសាសន៍សម្តេច បវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សុទ្ធតែបានដាក់កំហិតដល់ស្ថាប័នមានសមត្ថកិច្ចការពារព្រំដែនទាំងនគរបាល និងយោធាចូលរួមទប់ស្កាត់បទល្មើសឆ្លងដែនពី តាមច្រករបៀងព្រំដែនខ្មែរ-ថៃ ដើម្បីពង្រឹងសន្តិសុខ ទប់ស្កាត់បទឧក្រឹដ្ឋឆ្លងដែន អំពើចោរកម្មឆ្លង ដែន ទំនិញគេចពន្ធ គ្រឿងញៀនគ្រប់ប្រភេទការរត់ពន្ធមនុស្ស នៅតាមខ្សែបន្ទាត់ព្រំដែន ប្រកបដោយមានប្រសិទ្ធភាព។
ឯកឧត្តអភិសន្តិបណ្ឌិត ស សុខា ឧបនាយករដ្ឋមន្រ្តីរដ្ឋមន្ត្រីក្រសួងមហាផ្ទៃ បានលើកឡើងជម្រាបទៅដល់កងកម្លាំងទាំងអស់តាមព្រំដែនថា «ត្រូវបិទច្រករបៀងខុសច្បាប់ទាំងអស់ ក្នុងដែនសមត្ថកិច្ចរបស់ខ្លួន»។ បើក្នុងករណីចាំបាច់ត្រូវធ្វើការសិក្សាស្រាវជ្រាវ និង វាយតម្លៃលើ សក្តានុពលសេដ្ឋកិច្ច និងសង្គមរបស់ច្រកដែល មានស្រាប់សិន រួចលើកសំណើមកក្រសួងមហាផ្ទៃ ដើម្បីមានមូលដ្ឋានសិក្សា និងលើកយោបល់ជូនថ្នាក់ដឹកនាំពិនិត្យ និងសម្រេច ក្នុងការបង្កើតជាច្រកទ្វារព្រំដែនផ្លូវការ។
ចំណែកលោក អ៊ុន ចាន់ បែរជាមិនស្តាប់ថ្នាក់ដឹកនាំប្រទេសឡើយ សព្វថ្ងៃនៅច្រករបៀង អូរបីជាន់ កំពុងបើកដៃឲ្យក្រុមឈ្មួញ និងជនជាតិថៃ នាំទំនិញពីថៃចូលមកកម្ពុជាជាហូហែរ ទាំងថ្ងៃទាំងយប់ត្រង់ចំណុច ភូមិអូរបីជាន់ ឃុំអូរបីជាន់ ស្រុកអូរជ្រៅ ជាភូមិសាស្ត្រដែលយោធភូមិភាគទី៥ ប្រគល់អោយលោក អ៊ុន ចាន់ មេបញ្ជាការរង កងការពារព្រំដែនលេខ៥០៣ នៃ យោធភូមិ ភាគទី៥ គ្រប់គ្រង។
លោក អ៊ុន ចាន់ មេបញ្ជាការរងបានបើកដៃឲ្យឈ្មួញនាំទំនិញគេចព័ន្ធជាច្រើនប្រភេទ សាច់មាន់ខូចគុណភាព គ្រឿងក្នុងជ្រូក ម៉ូតូ ដោយមិនមានការត្រួតពិនិត្យ និងទំនិញដែលត្រូវហាមឃាត់មិនអោយនាំចូលច្រកទ្វេភាគី និងច្រកអន្តរជាតិបិតខ្ទប់ តែត្រូវនាំចូលបានយ៉ាងរលូនតាមច្រករបៀង អូរបីជាន់ ដែលកាន់កាប់ដោយលោក អ៊ុន ចាន់ មេបញ្ជាការរងផ្គើនយ៉ាងគឃ្លើន អត់កោតក្រែងអ្វីឡើយ ។
តាមប្រភពបានឲ្យដឹងថា នៅច្រករបៀងអូរបីជាន់ មានស្ថាប័នមួយចំនួនឈរជើងប្រចាំច្រករបៀងនេះដែរ ហើយឈ្មួញបានបង់ លុយឲ្យស្ថាប័ន គយ នគរបាល សេដ្ឋកិច្ចខេត្ត ប្រចាំច្រកខាងលើនោះដោយប្រើមាត់ជាវិក្កយបត្រ័ ឬហៅថា បង់ប្រាក់តាមការចរចារព្រមព្រៀងគ្នា បង់រួចអាចនាំទំនិញចេញ ឬនាំចូលទៅមកបានយ៉ាងរលូននៅតាមច្រករបៀងនេះ នៅតែដំណើរការរហូតដល់បច្ចុប្បន្នដែលគេសង្ស័យថា មានការត្រូវគ្នាជាមួយអាជ្ញាធរ មន្ត្រីជំនាញ ក្នុងមូលដ្ឋានទើបបើកឲ្យទំនិញនាំចូលមិនបានបង់ពន្ធដល់សព្វថ្ងៃនេះ។
ចំណែកលោក រឿង សារិត មេបញ្ជារការកងការពារព្រំដែនលេខ៥០៣ មើលទៅត្រូវគេសង្ស័យថា កំពុងបើកដៃអោយលោក អ៊ុន ចាន់ ជាមេបញ្ជាការរង ប្រព្រឹត្តផ្ទុយពីបទបញ្ជាថ្នាក់ដឹកនាំកំពូលផងដែរ ទើបលោក អ៊ុន ចាន់ អាចឃុបឃិតបើកច្រកដោយសេរីបែបនេះ។
ករណីនេះ តើលោកឧត្ដមសេនីយ៍ឯក ឯក សំំអូន មេបញ្ជាការយោធភូមិភាគទី៥ បានជ្រាបដែរឬ?អំពីការបើកច្រករបៀងអូរ៣ជាន់របស់លោក អ៊ុន ចាន់ មេបញ្ជាការរងដែលអនុញាត្តិឲ្យឈ្មួញខ្មែរ.ថៃ នាំចូលទំនិញចូលដោយសេរីទាំងយប់ទាំងថ្ងៃ ផ្គើនទាំងបំរាម គណ:ឯកភាពខេត្តនិងថ្នាក់ដឹកនាំកំពូលជាតិដែរឬទេ? ។
ពាក់ព័ន្ធព័ត៌មានខាងលើគេហទំព័រ (www. enn-tv.com)យើងខ្ញុំរងចាំនូវការពន្យល់ បកស្រាយពីលោក អ៊ុន ចាន់ មេបញ្ជាការរង កងការពារព្រំដែនលេខ ៥០៣ នៃយោធភូមិ ភាគទី៥ រាល់ម៉ោងធ្វើការ៕មានត