ខេត្តរតនគីរី ៖ ប្រភពបានឲ្យដឹងទៀតថាលោក នូវ ដារ៉ា បានបង្កើតកុងត្រូលជជុះ នៅគ្រប់ច្រកល្ហកដើម្បីជំរិតយកលុយពីឈ្មួញដឹកជញ្ជូនឈើខុសច្បាប់ និងពីឈ្មួញដឹកជញ្ជូនទំនិញគេចពន្ធដោយគ្មានញញើតអ្វីទាំងអស់មន្ត្រីនគរបាលតូចតាចនៅក្នុងស្នងការដ្ឋាននគរបាលខេត្តរតនគិរី បានឲ្យដឹងថា លោក នូវ ដារ៉ា នាយការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត កំពុងប្រើអំណាចនិងតួនាទីដើម្បីប្រមូលលុយយកទៅធ្វើមានធ្វើបាន ផ្ទាល់ខ្លួន និងបែងចែកទៅថ្នាក់លើយ៉ាងរលូន មានន័យថាលោក នូវ ដារ៉ា កំពុងជាន់ឈ្លីបទបញ្ជារបស់រដ្ឋាភិបាលលោក ហ៊ុន សែន ក្នុងការលុបបំបាត់កុងត្រូលជជុះដែលរំខានដល់ការរកស៊ីចិញ្ចឹមជីវិតរបស់អាជីវករ និងប្រជាពលរដ្ឋ។
តាមប្រភពខ្លះបានឲ្យដឹងថា លោក នូវ ដារ៉ា បានប្រើគ្រប់វិធីក្នុងការផ្ដួលលោក ស៊ិន សុខន ដើម្បីឡើងធ្វើជាប្រធានការិយាល័យនគរបាលប្រឆាំងបទល្មើសសេដ្ឋកិច្ចនៃ ស្នងការដា្ឋននគរបាលខេត្តរតនគិរី។ ការដែលលោក នូវ ដារ៉ា អាចធ្វើអ្វីៗស្រេចតែអំពើចិត្តគឺមានការបើកដៃពីលោក ងួន គឿន ស្នងការនគរបាលខេត្តរតនគិរីផងដែរ ជាពិសេសការបង្កើតកុងត្រូលជជុះដើម្បីជំរិតយកលុយពីក្រុមឈ្មួញ ដឹកជញ្ជូនឈើប្រណីតខុសច្បាប់។ ក្នុងចំណោមមន្ត្រីនគរបាលប្រឆាំងបទល្មើសសេដ្ឋកិច្ចខេត្តរតនគិរី ប្រមាណ២០នាក់គឺលោក នូវ ដារ៉ា ជ្រើសរើសមនុស្សស្និទ្ធនឹងខ្លួនតែប៉ុន្មាននាក់ប៉ុណ្ណោះ ឲ្យបង្កើតកុងត្រូលជជុះជំរិតយកលុយពីឈ្មួញដឹកជញ្ជូនឈើ និងពីរោងសិប្បកម្មកែច្នៃឈើជាច្រើនកន្លែងក្នុងក្រុងបានលុង និងបណ្ដាស្រុកនានា។
សេចក្តីរាយការណ៍ពីប្រភពដែលស្និទ្ធនឹងលោក នូវ ដារ៉ា បានឲ្យដឹងថានគរបាលប្រឆាំងបទល្មើសសេដ្ឋកិច្ចខេត្តរនតគិរី បានជំរិតយកលុយពីរថយន្តដឹកជញ្ជូនឈើតាមអំពើចិត្ត គឺរថយន្តតូចៗត្រូវបង់ចាប់ពី៣០ដល់៥០ដុល្លារក្នុងមួយគ្រឿង។ ចំណែករថយន្តធំៗត្រូវបង់លុយឲ្យនគរបាលប្រឆាំងបទល្មើសសេដ្ឋកិច្ច ក្នុងមួយគ្រឿងពី២០០ដល់៥០០ដុល្លារ ហើយសូម្បីតែរថយន្តដឹកឈើរបស់មេឈ្មួញ ទ្រី ភាព ក៏កូនចៅលោក នូវ ដារ៉ា ហ៊ានសុំលុយថ្លៃបាយដែរ។ មិនតែប៉ុណ្ណោះចំពោះសិប្បកម្មកែច្នៃឈើឬដេប៉ូលក់ឈើក្នុង ខេត្តរតនគិរី ត្រូវកូនចៅរបស់លោក នូវ ដារ៉ា ជំរិតយកលុយក្នុងមួយកន្លែងចាប់ពី១៥០០ដល់២០០០ដុល្លារ បើមិនដូច្នេះត្រូវប្រឈមនឹងការបង្ក្រាបជាមិនខាន។ ទាំងសិប្បកម្មកែច្នៃឈើស្របច្បាប់និងសិប្បកម្មខុសច្បាប់ សុទ្ធតែត្រូវបង់លុយឲ្យនគរបាលប្រឆាំងបទល្មើសសេដ្ឋកិច្ចរបស់លោក នូវ ដារ៉ា ដើម្បីចៀសវាងនូវការបង្ក្រាបនាំឲ្យខាតបង់ផលប្រយោជន៍ធំ ។
ពាក់ព័ន្ធករណីនេះ សារព័ត៌មានយើងមិនអាចសូមការទំនាក់ទំនងលោក ដារ៉ា បាននោះទេ ៕