ភ្នំពេញ ៖ ទោះបីជាមានការរារាំងពីអាជ្ញាធរសមត្ថកិច្ច នៅតាមផ្លូវ កាលពីព្រឹកថ្ងៃទី៣០មិថុនានេះ ក៏ក្រុមសកម្មជនអង្គការសង្គមស៊ីវិល ចុងក្រោយ នៅម៉ោងជាង ១០ ព្រឹកថ្ងៃទី៣០មិថុនានេះ បានទៅប្រមូលផ្តុំ ឈរតវ៉ា លើកបដា នៅមុខរដ្ឋសភា។
សូមរម្លឹកថា នៅព្រឹកថ្ងៃទី៣០មិថុនានេះ ក្រុមសកម្មជនអង្គការសង្គមស៊ីវិលជាច្រើន បានធ្វើយុទ្ធនាការជួបជុំ ហែក្បួន នៅភ្នំពេញ ដើម្បីប្រឆាំងនឹងសេចក្តីព្រាងច្បាប់ ស្តីពី សហជីព ព្រមទាំងច្បាប់ សមាគម និងអង្គការមិនមែនរដ្ឋាភិបាល។ ក្រុមសកម្មជនអង្គការសមាគម ព្រមទាំងសកម្មជនដីធ្លី បានជួបជុំគ្នានៅ ៤ កន្លែងផ្សេងទៀត រួមមាន នៅចាក់អង្រែ តាមផ្លូវជាតិលេខ២ នៅវត្តនិរោធ ផ្លូវជាតិលេខ១ នៅស្ពាន ៧មករា ស្តុបពេទ្យលោកសង្ឃ និងនៅមុខស្ថានទូតបារាំង ដើម្បីដើរហែក្បួន ទៅកាន់រដ្ឋសភា។
ក៏ប៉ុន្តែអាជ្ញាធររាជធានីភ្នំពេញ ដែលមានសន្តិសុខតាមខណ្ឌនិមួយៗ បានចាត់វិធានការ រារាំង មិនឲ្យមានការហែក្បួនទេ ក្នុងបំណងរក្សាសន្តិសុខ សណ្តាប់ធ្នាប់សាធារណៈ។ ក្នុងនោះ នៅមុខស្ថានទូតបារាំង កងកម្លាំងសន្តិសុខខណ្ឌដូនពេញ បានចាប់ខ្លួនសកម្មជនដីធ្លី រួមមាន អ្នកស្រី ទេពវន្នី ព្រមទាំងស្ត្រីសកម្មជនជាច្រើនទៀត។ តែក្រោយមកដោះលែងវិញ។
លោក ណៃ វ៉ាន់ដា សកម្មជនអង្គការអាដហុក ដែលបានចូលរួមដើរហែក្បួន នៅផ្លូវជាតិលេខ២ ចេញពីវត្តចាស់អង្រែលើ បានឲ្យដឹងថា នៅកន្លែងផ្សេងទៀត ក៏ត្រូវអាជ្ញាធរសមត្ថកិច្ចរារាំង និងដកហូតយកបដា ប៉េងប៉ោង ព្រមទាំងផ្កាឈូកពីក្រុមសកម្មជនអ្នកតវ៉ាផងដែរ។
សូមរម្លឹកថា សកម្មជនអង្គការសង្គមស៊ីវិល ព្រមទាំងសកម្មជនដីធ្លី បានធ្វើយុទ្ធនាការរយៈពេល ៣ ថ្ងៃ ចាប់ពីព្រឹកថ្ងៃអាទិត្យ ថ្ងៃទី២៨ ខែមិថុនា ដោយជួបជុំ លើកបដា ដើរហែក្បួន នៅមុខរដ្ឋសភា ក្នុងគោលបំណង ដើម្បីបង្ហោះប៉េងប៉ោង និងបង្ហាញបដា ជំទាស់នឹងសេចក្តីព្រាងច្បាប់ ស្តីពី សមាគម និងអង្គការមិនមែនរដ្ឋាភិបាល ព្រមទាំងច្បាប់សហជីព ដែលក្រុមសកម្មជនអង្គការសមាគម និងសហជីព អះអាងថា ច្បាប់នោះ មិនអាចទទួលយកបានទេ។
យ៉ាងណាក៏ដោយ រដ្ឋសភា នៅបន្តដំណើរការនីតិវិធី ដោយគណៈកម្មការជំនាញរដ្ឋសភា កំពុងពិនិត្យសិក្សា ហើយបានសម្រេចថា នឹងបើកសិក្ខាសាលាពិគ្រោះយោបល់លើសេចក្តីព្រាងច្បាប់សមាគម និងអង្គការមិនមែនរដ្ឋាភិបាល នៅថ្ងៃទី១០កក្កដាខាងមុខ នៅរដ្ឋសភា៕