មន្ត្រីមកពីក្រសួងសុខាភិបាលបានឲ្យដឹងនៅថ្ងៃចន្ទថា ស្ថានភាពសុខភាពអ្នកជំងឺ ដែលឆ្លងវីរុស MERS លើកដំបូងនៅក្នុងប្រទេសថៃ ដែលជាបុរសអ្នកជំនួញវ័យ៧៥ម្នាក់មកពីប្រទេសអូម៉ង់ និងបានចូលក្នុងប្រទេសថៃកាលពីរយៈពេល៧ថ្ងៃមុននោះ បានល្អប្រសើរវិញហើយ។
លោកវ៉ាជីរ៉ា ប៉េងចាន គឺជាអនុរដ្ឋមន្ត្រីអចិន្ត្រៃយ៍នៃក្រសួងសុខាភិបាលថៃ បាននិយាយថា ក្នុងរយៈពេល៧ថ្ងៃកន្លងមកនេះ សុខភាពរបស់អ្នកជំងឺ ល្អប្រសើរពីមួយថ្ងៃទៅមួយថ្ងៃ ដែលនេះ គឺជាសញ្ញាវិជ្ជមានមួយ អាចវាយតម្លៃបានពីហានិភ័យនៃការឆ្លងវីរុសដ៏កាចសហាវនេះ នៅក្នុងប្រទេសថៃ។
សូមបញ្ជាក់ថា បុរសដែលគេមិនបានផ្តល់អត្តសញ្ញាណច្បាស់លាស់ម្នាក់នេះ បានចូលមន្ទីរពេទ្យកាលពីថ្ងៃព្រហស្បតិ៍សប្តាហ៍កន្លងទៅ ហើយក្រុមគ្រូពេទ្យនៅឯមន្ទីរពេទ្យប៊ុមរ៉ាំងរ៉ាដ បានឲ្យដឹងថា មនុស្ស៥៨នាក់ ត្រូវបានដាក់ឲ្យនៅដាច់ដោយឡែកពីគ្នា ហើយស្ថិតនៅក្រោមការតាមដាន។
សេចក្តីថ្លែងការណ៍មួយរបស់ក្រសួងសុខាភិបាលបានអះអាងថា មកទល់នឹងពេលនេះ ប្រទេសថៃ មានករណីឆ្លងវីរុស MERS តែម្នាក់ប៉ុណ្ណោះ ខណៈដែលសាច់ញាតិ៣នាក់ទៀត របស់ជនរងគ្រោះ គ្មានសញ្ញាណាមួយ បង្ហាញពីការឆ្លងវីរុសនោះទេ៕
