ភ្នំពេញ ៖ ប៉ូលិសនៅអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ នៅវេលាម៉ោងជាង១២ ថ្ងៃទី២៣ ខែមិថុនា ឆ្នាំ២០១៥នេះ បានធ្វើការឡោមព័ទ្ធឆែកឆេរជនបរទេស ដែលមានជនជាតិវៀតណាម និងចិន ធ្វើការជាកម្មករសំណង់នៅមជ្ឈមណ្ឌលកម្សាន្តកោះពេជ្រ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ការចុះត្រួតពិនិត្យនិងឆែកឆេរនេះ ដឹកនាំដោយលោក មាស ច័ន្ទពិសិដ្ឋ ព្រះរាជអាជ្ញារង អមសាលាដំបូងរាជធានីភ្នំពេញ សហការជាមួកម្លាំងអគ្គនាយកដ្ឋានអន្តោប្រវេសន៍ និងកម្លាំងមូលដ្ឋានខណ្ឌចំការមន ថាតើជនជាតិវៀតណាមទាំងរាប់រយនាក់នោះ មានច្បាប់ ឬលិខិតស្នាមត្រឹមត្រូវដែរទេ។
ប៉ូលិសឲ្យដឹងថា បន្ទាប់ពីការត្រួតពិនិត្យទាំងពីរគោលដៅនោះ គឺមានកម្មករជន ជាតិចិន និងវៀតណាម សរុប ២១៥ នាក់ ដោយមានចិន ៨៤ នាក់ និងវៀតណាម ១៣១ នាក់។ ក្នុងនោះ ខ្លះមានលិខិតឆ្លងដែន និងខ្លះមិនមានលិខិតស្នាមអ្វីទេ។ ប៉ុន្តែជនជាតិចិន និងវៀតណាមទាំងនោះ មិនមានប័ណ្ណការងារ ដើម្បីធ្វើការស្របច្បាប់នៅកម្ពុជានោះទេ។
អាជ្ញាធរសមត្ថកិច្ច មិនទាន់ចាត់វិធានការបែបណាចំពោះកម្មករចិន និងវៀតណាមទាំងនោះ នៅឡើយទេ៕