ព្រះសីហនុ៖ មតិប្រជាជនពលរដ្ឋ បាននិយាយថា ក្នុងរយៈកាល ជាច្រើនអាណត្ដិ កន្លងមកដែល សម្ដេចតេជោ នាយករដ្ឋមន្ដ្រី ហ៊ុន សែន បានប្រគល់អំណាច ទៅឲ្យលោក ប៉ែន ស៊ីម៉ន ធ្វើជាអគ្គនាយកគយ ដុះស្លែផ្ដាច់មុខ តែម្នាក់ឯងនេះ មិនដឹងជាបាន និងកំពុងធ្វើឲ្យ រដ្ឋត្រូវបាត់បង់ ចំណូលចូលថវិកាជាតិ ក្នុង១ថ្ងៃៗ ១ខែៗ ១ឆ្នាំៗ និង១អាណត្តិៗ ចំនួនប៉ុន្មានម៉ឺន សែន និងលានដុល្លារនោះទេ ។
ដោយសារហេតុថា អំពើពុករលួយនោះ វាផ្ដើមឡើងពី ឬកើតចេញពី ការដឹកនាំតាមបែប បក្ខពួកនិយម ក្រុមគ្រួសារនិយម និងការិយាធិបតេយ្យនិយម ជាច្រើនឆ្នាំមកហើយ ដូចជាការតែងតាំង មន្ត្រីៗគយឲ្យនៅកន្លែងខ្លាញ់ ឬឲ្យធ្វើការងារសំខាន់ៗ ដដែលៗតាមរបៀប ចែកគ្នាស៊ីវិលជុំ តែបក្ខពួកខ្លួនឯង បងប្អូនកូនក្មួយខ្លួនឯង ឬក្រុមគ្រួសារសាច់ញ្ញាតិខ្លួនឯង ជាដើម ។
ប៉ុន្តែបន្ទាប់មក មិនបានប៉ុន្មានថ្ងៃផងលោក គិន លី មិនត្រឹមតែអត់ត្រូវបាន ច្បាប់ដាក់ទោសប៉ុណ្ណោះទេ គាត់ (គិន លី) បែរជាបានរួចខ្លួនហើយ ថែមទាំងត្រូវបានលោក ប៉ែន ស៊ីម៉ន តែងតាំងឲ្យធ្វើជា ប្រធានការិយាល័យគយ និងរដ្ឋាករ ប្រចាំនៅកំពង់ផែ ស្វយ័តភ្នំពេញ យ៉ាងគ្រហ៊ើៗ ធ្វើឲ្យមន្ត្រីៗគយមួយចំនួន និងសាធារណជនភាគច្រើន មានការភ្ញាក់ផ្អើល ស្រឡាំងកាំងទៅវិញ ។
តាំងពីលោក គិន លី បានទៅធ្វើជាមេគយ នៅកំពង់ផែក្រុងព្រះសីហនុ សារជាថ្មីឡើងវិញកាលណាមក មានព័ត៌មានប្រាប់ឲ្យដឹងថា ពួកឈ្មួញៗ និងក្រុមអ្នករត់ការ ឯកសារទាំងឡាយ មិនសប្បាយចិត្តនឹង វត្តមានរបស់លោក គិន លី ទាល់តែសោះ ព្រោះគាត់ពូកែបង្កើតល្បិច គាបយកលុយស្រស់ៗពីពួកគេ (ពួកឈ្មួញៗ និងក្រុមអ្នករត់ការ) ។ ពួកគេនិយាយថា សព្វថ្ងៃនេះ គ្រាន់តែឯកសារ ចុះប្រតិវេទន៍គយ ក្នុងមួយថ្ងៃៗមាន រាប់រយឯកសារឯណោះ… ហើយក្នុងមួយឯកសារ ការចំណាយក្រៅផ្លូវការ មានចាប់ពី ១ម៉ឺនរៀល ដល់ ១០ដុល្លារអាមេរិក ដែលនេះមិនទាន់គិត ពីការកោសរូស ចាប់កំហុសផ្សេងៗនោះទេ ។
ហើយការបង់លុយនេះ ធ្វើឡើងច្រើនដំណាក់កាល រាប់តាំងពីផ្នែកគណនេយ្យកន្លែងបោះត្រា និងកន្លែងត្រួតពិនិត្យទំនិញ ព្រមទាំងកន្លែងសំខាន់ ជាងគេបំផុតនោះគឺ នៅចំណុចអ្នកអនុញ្ញាត ឲ្យរថយន្ដដឹកទំនិញចេញ-ចូល ទាល់តែមានការឯកភាព (បង់លុយគ្រប់ចំនួន) ពីលោកប្រធាន (គិន លី) ទើបគេអនុញ្ញាតឱ្យ រថយន្ដអាចចេញ-ចូលបាន ឬក៍អាចយកទំនិញ ចេញពីកំពង់ផែនោះបាន ។
ប្រភពព័ត៌មាន បានប្រាប់ឲ្យដឹងទៀតថា លោកប្រធាន គិន លី ក៍ត្រូវប៉ាន់មិនតិចដែរ នឹងការអនុញ្ញាត ឲ្យពួកឈ្មួញខ្លះ បាននាំចេញទៅលក់ នៅក្រៅប្រទេស ទាំងកុងទីន័រៗ នូវទំនិញបាតឃ្លាំងអន់ៗ… ដែលពួកគេប្រមូលទិញ ពីរោងចក្រមួយចំនួននៅកម្ពុជា ។ បន្ថែមពីលើនេះ នៅមានទំនិញ មានតម្លៃជាច្រើនទៀត ដែលត្រូវបានឈ្មួញ នាំចូលពីបរទេសមកកម្ពុជា ទាំងកុងទីន័រៗដែរ… តែងមានឈ្មួញខ្លះ លួចដាក់បង្កប់ នៅខាងក្នុងនូវ ទំនិញគេចពន្ធ ស្ទើរមិនដែលខានទេ… ដែលចំណុចនេះ ក៍បាននិងកំពុង ធ្វើឲ្យលោកប្រធាន គិន លី មេសាខាគយ ប្រចាំកំពង់ផែ អន្ដរជាតិ ក្រុងព្រះសីហនុ អាចរកចំណូលផ្ទាល់ខ្លួន បានមិនតិចឡើយ ក្នុង១ថ្ងៃៗ ឬ១ខែៗ ឬ១ឆ្នាំៗ និង១អណត្តិៗនោះ ។
មានមន្ត្រីខ្លះ បាននិយាយថា ទោះបីពេលនេះទៅហើយលោក គិន លី នៅតែអាងអំណាចលោក ប៉ែន ស៊ីម៉ន យ៉ាងណាក៍ដោយ ក៍នឹងមិនអាចទៅរួចទៀតដែរ ព្រោះលោក ប៉ែន ស៊ីម៉ន ត្រូវបានដកហូត (ដាក់ឲ្យចូលនិវត្តិន៍) ពីមុខតំណែង កាលពីថ្ងៃទី០១ ខែតុលា ឆ្នាំ២០១៤ រួចទៅហើយៗ ពេលនេះលោក គុណ ញឹម (ជាមន្ត្រីស្និទ្ធនឹងឯកឧត្តម អូន ព័ន្ធមុនីរ័ត្ន រដ្ឋមន្ត្រីថ្មី នៃក្រសួងសេដ្ឋកិច្ច និងហិរញ្ញវត្ថុ) ក៍ត្រូវបានតែងតាំងជា អគ្គនាយកគយ និងរដ្ឋាករ បន្តជំនួសលោក ប៉ែន ស៊ីម៉ន រួចទៅហើយដែរ… ដែលគេសង្ឃឹមថា អគ្គនាយកគយ និងរដ្ឋាករថ្មី គុណ ញឹម នឹងមិនទុកឲ្យលោក គិន លី នៅកាន់តំណែងដុះស្លែ អាចធ្វើអ្វីៗផ្ដេសផ្ដាស ស្រេចតែអំពើចិត្ត បានដូចសម័យលោក ប៉ែន ស៊ីម៉ន នៅធ្វើមេគយធំដុះស្លែ ទាំងបងទាំងប្អូននោះឡើយ ។
ផ្ទុយទៅវិញ សាធារណជន បាននិយាយតៗគ្នាថា បន្ទាប់ពីរាជរដ្ឋាភិបាល បានដកហូតតំណែងលោក ប៉ែន ស៊ីម៉ន ដាក់លោក គុណ ញឹម ជាអគ្គនាយកគយ និងរដ្ឋាកររួចហើយ… ទាំងឯកឧត្តមរដ្ឋមន្ត្រីថ្មី អូន ព័ន្ធមុនីរ័ត្ន និងអគ្គនាយកគយ (ថ្មី) គុណ ញឹម ត្រូវតែធ្វើការផ្លាស់ប្ដូរ ឬការកែទម្រង់ ស៊ីជម្រៅពិតប្រាកដ ដោយដកតំណែង មន្ត្រីៗគយដុះស្លែខ្សែលោក ប៉ែន ស៊ីម៉ន ដូចជាលោក ប៉ែន សំអាត, ប៉ែន សារ៉ាត់, កែវ សុខឃាង, កើត សុទ្ធារ៉ា, គិន លី និង សុខ គឹមសាន្ត… ។ល។ ដាក់មន្ត្រីៗថ្មីល្អៗជំនួស ស្ដារប្រជាប្រិយភាពស្ថាប័នគយ ឲ្យល្អប្រសើរឡើងវិញវិញ ដើម្បីកុំឲ្យគេថា រដ្ឋមន្ត្រីថ្មី អូន ព័ន្ធមុនីរ័ត្ន និងរដ្ឋមន្ត្រីចាស់ គាត ឈន់ ជាមួយនឹងមេគយថ្មី គុណ ញឹម និងមេគយចាស់ ប៉ែន ស៊ីម៉ន ឌាតែខ្នូច… ដូចតែគ្នាដដែលនោះ…។
ទាក់ទិននឹងព័ត៌មានខាងលើ អ្នកសារព័ត៌មានមិនអាចសុំការបំភ្លឺបានឡើយ ៕