ព្រៃវែង៖ បែកធ្លាយភាពមិនប្រក្រតីរបស់លោកវសេនីយ៍ឯក ណាំ សុវណ្ណារ៉ា នាយប៉ុស្តិ៍នគរបាលច្រកទ្វារព្រំដែនអន្តរជាតិបន្ទាយចក្រីប្រព្រឹត្តរបៀបអំពើពុករលួយប្រើដៃជើងរបស់ខ្លួន ឱ្យដើរប្រមូល លុយពីរថយន្តដឹកស្រូវ ក្នុង១ជើងៗចំនួន ៣០.០ ០០រៀលជាកំហិតនិងគាបយកលុយពីជនជាតិ វៀតណាម ដែលចូលមកលេងល្បែងសុីសងនៅ កាស៊ីណូក្នុងម្នាក់ៗ ចាប់ពី៣០ម៉ឺនដុងទៅ ៥០ម៉ឺន ដុង(លុយវៀតណាម) ក្រោមរូបភាពបោយដៃបិទភ្នែកបើកភ្លើងខៀវអោយមេខ្យល់នាំជនជាតិវៀត ណាម ជិៈទូកវាងច្រកទ្វារព្រំដែន ដើម្បីចេញចូលឆ្លងដែន មកលេងល្បែងក្នុងកាស៊ីណូ ដោយពុំមានការត្រួត ពិនិត្យលើលិខិតស្នាមឬប៉ាស្ព័រ អ្វីទាំងអស់។
ប្រភពពីអាជីវករបានអោយដឹងថា ជារៀងរាល់លើក ដែលខ្លួនដឹកជញ្ជូនស្រូវទៅលក់អោយឈ្មួញវៀតណាម តាមច្រកទ្វារព្រំដែនអន្តរជាតិបន្ទាយចក្រី ស្រុកព្រះស្ដេច ខេត្តព្រៃវែង គឺត្រូវ បង់លុយអោយមន្ត្រីនគរ បាលច្រកទ្វារព្រំដែនអន្តរជាតិបន្ទាយចក្រីចំនួន៣០.០០០ រៀលជាកំហិត និងបង់ឱ្យបេនចំនួន១០.០០០រៀល សរុប ១ជើងបង់អស់ ៤០.០០០ រៀល។
ប្រភពអាជីវករដដែលបានបន្តថា មិនមែនតែខ្លួនម្នាក់ឯងនោះទេ ដែលត្រូវបង់លុយឱ្យប៉ូលីសព្រំដែននោះ(ពោលគឺ) អាជីវករច្រើនទៀត ក៏ត្រូវបង់ លុយឱ្យនគរបាលព្រំដែន ដូច គ្នានឹងរូបគាត់ដែរដោយគ្មាននរណាម្នាក់ អាចគេចផុតពីការបង់លុយនោះឡើយ។ក្នុង១ថ្ងៃៗមានរថយន្ត ដឹកស្រូវ រាប់សិបគ្រឿងបានដឹកជញ្ជូនស្រូវ ពីបណ្ដាខេត្តនានាដើម្បីយកមកលក់ឱ្យឈ្មួញវៀត ណាម នៅច្រកទ្វារព្រំដែនអន្តរជាតិបន្ទាយចក្រីយ៉ាងគគ្រឹកគគ្រេង។
ប្រភពពីមន្ត្រីក្រោមឱវាទបានលួចបង្ហើបថា លោក ណាំ សុវណ្ណារ៉ា នាយប៉ុស្តិ៍នគរបាលច្រកទ្វារព្រំដែនអន្តរជាតិបន្ទាយចក្រីបានប្រើជនស៊ីវិលឈ្មោះ ណាង ឱ្យដើរប្រមូលសេដ្ឋកិច្ចចូលហោប៉ាវ តាមរយៈលោក យិន ឡងឌី នាយរងប៉ុស្តិ៍នគរ បាលច្រកទ្វារព្រំដែនអន្តរជាតិបន្ទាយចក្រីនោះ។
ជាក់ស្ដែង រាល់ថ្ងៃជនជាតិវៀត ណាម ដែលចូលមកលេងល្បែងសុីសងក្នុងកាស៊ីណូនៅក្បែរច្រកទ្វារព្រំដែន គឺត្រូវបង់ លុយឱ្យ នគរបាលច្រកទ្វារព្រំដែនអន្តរជាតិបន្ទាយចក្រី យ៉ាងទៀងទាត់ ទើបអាចជិៈទូកឆ្លងដែន វាងច្រកទ្វារ មក លេងល្បែងដោយសេរីបានគឺត្រូវ បង់លុយឱ្យនគរបាលច្រកទ្វារព្រំដែនអន្តរជាតិបន្ទាយ ចក្រី ក្នុងម្នាក់ៗចាប់ ពី១០ម៉ឺនដុង ទៅ២០ម៉ឺនដុងលុយវៀតណាម ។ក្នុងនោះបើជនជាតិវៀតណាម ដែលនៅឆ្ងាយពីព្រំដែន ឬខេត្តផ្សេងៗ ហើយឆ្លងដែនមកលេងល្បែងនៅកាស៊ីណូ លើដីខ្មែរ ក្នុងឃុំបន្ទាយចក្រី ស្រុកព្រះស្ដេច ខេត្តព្រៃវែង។គឺត្រូវបង់លុយអស់ចាប់ ពី៣០ម៉ឺនដុងទៅ៥០ម៉ឺនដុងលុយវៀតណាម សម្រាប់ម្នាក់ ៗទើបពួកគេ អាចជិៈទូក ចេញចូលឆ្លងដែនពីវៀតណាមមកកម្ពុជា និងពីកម្ពុជាទៅ វៀតណាម ដោយវាងច្រកទ្វារព្រំដែនបានយ៉ាងដោយរលូនរាល់ថ្ងៃ។ ប៉ុន្តែក្នុងនោះមានមេខ្យល់ជាអ្នកដឹកនាំ និងប្រមូលលុយមកប្រគល់ឱ្យ នគរ បាលច្រកទ្វារព្រំដែនអន្តរជាតិបន្ទាយចក្រី ។
អាជីវករអ្នកដើរទិញស្រូវពីកសិករ រួចដឹកជញ្ជូន មកលក់ឱ្យឈ្មួញវៀតណាម នៅច្រកទ្វារព្រំដែនអន្តរជាតិបន្ទាយ ចក្រី សូមសំណូមពរដល់ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ មេត្តាចាត់វិធានការ ទប់ស្កាត់កុំឱ្យមានការយកលុយពីរថយន្តដឹកស្រូវតទៅទៀត និងសូមឱ្យស្រាវជ្រាវពីភាពមិនប្រក្រតី ចំពោះការចេញចូលព្រំដែន រួមនិងការដឹកទំនិញបន្លែ ផ្លែឈើ ត្រីសាច់ ដែលឆ្លងកាត់ច្រកទ្វារព្រំដែនអន្តរជាតិមួយនេះទាន។ពាក់ព័ន្ធព័ត៌មានខាងលើគេហទំព័រ(www.enn-tv.com)យើងខ្ញុំរងចាំនូវការពន្យល់បកស្រាយពីលោក ណាំ សុវណ្ណារ៉ា នាយប៉ុស្តិ៍នគរបាលច្រកទ្វារព្រំដែនអន្តរជាតិបន្ទាយចក្រី និងលោក យិនឡងឌី នាយរងប៉ុស្តិ៍នគរបាលច្រកទ្វារព្រំដែនអន្តរជាតិបន្ទាយចក្រី រាល់ម៉ោងធ្វើការ៕