ខេត្តកំពង់ចាម : សេចក្តីរាយការណ៍ពីប្រជាពលរដ្ឋរស់នៅស្រុកកំពង់សៀម ខេត្តកំពង់ចាម បានឲ្យដឹងថា លោក កាន់ សុង ប្រធានការិយាល័យពន្ធដារស្តីទីស្រុកកំពង់សៀម បានប្រព្រឹត្តនូវអំពើពុករលួយរាប់ឆ្នាំយកលេសរកលុយជូនថ្នាក់លើ គឺប្រធានសាខាពន្ឋដារខេត្តកំពង់ចាម។ ក្រុមអាជីវករកាប់ជ្រូក គោ ក្របី ដែលប្រកបរបរកាប់ជ្រូករាប់ឆ្នាំមកហើយ បានឲ្យដឹងថា ជារៀងរាល់ឆ្នាំ ពួកគាត់បានយកលុយទៅបង់ជូនលោក កាន់ សុង ប្រធានការិយាល័យពន្ធដារស្តីទីស្រុកកំពង់សៀម គឺបង់ពន្ធអាករពិឃាតជ្រូក និងបង់ពន្ធប៉ាតង់ មិនដែលមានការខកខានម្តងទេ។ ប៉ុន្តែក្រោយមកពេលគាត់ត្រូវការយកបណ្ណ័ប៉ាតង់ទៅប្រើប្រាស់ផ្សេងៗ គឺលោក កាន់សុង ប្រធានការិយាល័យពន្ធដារស្តីទីស្រុកកំពង់សៀម មិនបានចេញបណ្ណ័ប៉ាតង់ឲ្យគាត់ទេ ដោយរកលេសថា បណ្ណ័ប៉ាតង់ថ្នាក់ខេត្តធ្វើមិនទាន់ហើយ បើចង់បានលឿន គឺត្រូវបង់លុយទ្វេមួយជាពីរ។
ស្រដៀងគ្នានេះដែរអាជីវករផ្សេងទៀតបានឲ្យដឹងថា រៀងរាល់ដើមឆ្នាំគឺលោក កាន់សុង ប្រធានការិយាល័យពន្តដារស្តីទីស្រុកកំពង់សៀម បានទារលុយ ពន្ឋអាករពិឃាតជ្រូកគោក្របីពីអ្នកកាប់ជ្រូកដោយទារតំឡើងប្រាក់ពន្ឋ៣០ទៅ៤០ភាគរយជារៀងរាល់ឆ្នាំបើអ្នកណាមិនបង់តាមការកំណត់លោក សុង គម្រាមថាប្រយត្ន័ពិន័យតាមច្បាប់ពន្ឋដារ។ អជីវករបន្តទៀតថានៅក្នុងក្រដាសប្រមូលពន្ធដាក់តែមួយខែបង់១២ម៉ឺនរៀលតែទារប្រាក់ពីអ្នកកាប់ជ្រូកមួយខែពី៣០ទៅ៤០ម៉ឺន។ ចំពោះអាជីវករកាប់ជ្រូកគោក្របីថ្មីត្រូវលោកកាន់សុងចេញលិខិតកោះហៅមកទារលុយដាក់ហោប៉ាវពី១០០ទៅ២០០ដុល្លារ។ សព្វថ្ងៃនេះលោកកាន់សុងប្រធានការិយាល័យពន្ធដារស្តីទីស្រុកកំពង់សៀម កំពុងតែប្រព្រឹត្តអំពើពុករលួយជាចំហដូចជា ការកោសរូសឲ្យអាជីវករលក់ដូរ និងអាជីវករកាប់ជ្រូកកោក្របីមកបង់លុយប្រចាំថ្ងៃ ឬប្រចាំខែជ្រកក្រោមលេសបង់ពន្ឋដា។
អាជីវករលក់ដូរ នៅស្រុកកំពង់សៀម គឺមិនអាចគេចផុតពីក្រសែភ្នែក របស់លោក កាន់ សុង ប្រធានការិយាល័យពន្ធដារស្តីទីស្រុកកំពង់សៀមនោះទេហើយការទារលុយពីអាជីវករទាំងនេះលោក សុង ស្បថថាប្រាក់ពន្ធទាំងនោះគឺគាត់បានបង់ជូនថ្នាក់លើទាំងអស់ សូម្បីតែមួយសេនក្តីមួយរៀលក្តីក៏គាត់ មិនទុកដែរ។
តាមរបាយការណ៍ពីចំនួនអាជីវករកាប់ ជ្រូក គោ ក្របី ដែលម្ចាស់ភាស៊ីផ្ញើជូនសាលាស្រុកកំពង់សៀមបានឲ្យដឹងថា ចំនួនអាជីវករកាប់ ជ្រូក គោ ក្របីនៅស្រុកកំពង់សៀមសរុបជិត៥០នាក់។ ចុះបើលោក សុង យកលុយពន្ថប៉ាតង់ពីអាជីវករកាប់ ជ្រូក គោ ក្របី ហើយមិនចេញប៉ាតង់ក្នុងលក្ខណៈស៊ីដាច់រាប់ឆ្នាំមកហើយនោះមិនដឹង លោក កាន់ សុង ប្រធានការិយាល័យពន្ធដារស្តីទីស្រុកកំពង់សៀម សល់លុយចាយមិនអស់នោះទេនេះមិនគិតពីការប្រមូលប្រាក់ពន្ធមុខសញ្ញាផ្សេងទៀតផងហើយមិនដឹងថា លុយទាំងនោះចែកចាយថ្នាក់ណាផ្សេងទៀតទេបានជាថ្នាក់លើមិនមានហើបមាត់នោះ។
ពាក់ព័ន្ធនឹងការរិះគន់ខាងលើសារពត័មាន មិនអាចទាក់ទងការបំភ្លឺលោក កាន់ សុង ប្រធានការិយាល័យពន្ធដារស្តីទីស្រុកកំពង់សៀមបាននោះទេ ៕
