ភ្នំពេញៈ ប្រធានក្រុមការងារសាលាក្តីខ្មែរក្រហម និងជាតំណាងរដ្ឋាភិបាលកម្ពុជា បានគូសបញ្ជាក់ជាថ្មីថា រដ្ឋាភិបាលកម្ពុជា មិនមានសិទ្ធិលូកដៃក្នុងដំណើរការរបស់សាលាក្តីខ្មែរក្រហមនោះទេ បើទោះបីជាថ្មីៗនេះ សាលាក្តីកូនកាត់មួយនេះ មានការខ្វែងយោបល់គ្នា រវាងភាគីជាតិ និងអន្តរជាតិលើសំណុំរឿង ០០៣ និង ០០៤ ក្តី។
ក្នុងសន្និសីទសារព័ត៌មាន ក្រោយពិធីសម្ពោធបូជនីយដ្ឋាននៃការចងចាំ និងរំឭកវិញ្ញាណក្ខន្ធ ដល់ជនរងគ្រោះ ក្នុងរបបកម្ពុជាប្រជាធិបតេយ្យ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមការងារសាលាក្តីខ្មែរក្រហម លោក សុខ អាន បានថ្លែងថា ជំហររបស់រដ្ឋាភិបាលកម្ពុជាពាក់ព័ន្ធនឹងសំណុំរឿង ០០៣ និង ០០៤ រដ្ឋាភិបាលនៅតែបន្តសហប្រតិបត្តិការល្អជាមួយនឹងអង្គការ សហប្រជាជាតិទោះជាពេលនេះ មានការបន្តខ្វែងយោបល់គ្នា រវាងភាគីជាតិ និងអន្តរជាតិ លើសំណុំរឿង ០០៣ និង ០០៤ ពាក់ព័ន្ធទៅនឹងការពង្រីកសំណុំរឿងកាត់ទោសលើអតីតមេដឹកនាំ ខ្មែរក្រហមក៏ដោយ។
លោក សុខ អាន បញ្ជាក់ថា៖ «អ៊ីចឹង អ្វីដែលកំពុងកើតឡើង ជាការពិគ្រោះពិភាក្សា រវាងចៅក្រមស៊ើបអង្កេតទាំងពីរ ដែលកំពុងធ្វើការងារនេះហើយចៅក្រម គាត់មានយោបល់ មិនដូចគ្នា ប៉ុន្តែមិនមែនមានន័យថា គាត់ទាស់គ្នា ឈប់សហការទេ។ សហប្រតិបត្តិការគាត់ នៅតែបន្តធម្មតា»។
លោកបន្តថា ក្នុងតុលាការ មានព្រះរាជអាជ្ញា និងចៅក្រមច្រើន ដែលចេញពីប្រភពពីរ Common Law និង Civil Law ដែលពួកគេ ឆ្លងកាត់បទពិសោធ និងការរៀនសូត្រទ្រឹស្តីខុសគ្នា «អ៊ីចឹងយោបល់គាត់មិនអាចដូចគ្នាទេ គាត់បន្តជជែកគ្នាទៀតទៅ នេះជាការងារផ្ទៃក្នុងរបស់គេ រដ្ឋាភិបាលមិនអាចជ្រៀតជ្រែកទេ»។
កាលពីពេលថ្មីៗនេះ សហចៅក្រមស៊ើបអង្កេតជាតិ និងសហចៅក្រមស៊ើបអង្កេតអន្តរជាតិនៃអង្គជំនុំជម្រះវិសាមញ្ញក្នុង តុលាការកម្ពុជា បានខ្វែងគំនិតគ្នាលើការពង្រីកវិសាលភាពនៃដំណើរការស៊ើបសួរ នៃសំណុំរឿង ០០៣ និង ០០៤ បន្ទាប់ពីភាគីជាតិ ទាំងសហព្រះរាជអាជ្ញា និងសហចៅក្រមស៊ើបអង្កេត មិនទទួលសំណើនៃកិច្ចស៊ើបសួរ ដែលភាគីអន្តរជាតិ កាលពីថ្ងៃទី ៣ ខែមីនា បានសម្រេចដាក់អតីតមេដឹកនាំខ្មែរក្រហម ២ រូប គឺលោក មាស មុត ក្នុងសំណុំរឿង ០០៣ និងអ្នកស្រី អ៊ឹម ចែម ក្នុងសំណុំរឿង ០០៤ ឲ្យស្ថិតនៅក្រោមការត្រួតពិនិត្យដោយកំបាំងមុខ។
ក្នុងសន្និសីទដដែលនោះ លោក សុខ អាន ក៏បានប្រតិកម្មតបទៅលើរបាយការណ៍របស់អង្គការ Human Rights Watch ដែលថា រដ្ឋាភិបាលកម្ពុជា រារាំងមិនឲ្យសំណុំរឿង ០០៣ និង ០០៤ ចេញរួច ហើយថា អង្គការសហប្រជាជាតិ គួរតែដកខ្លួន ចេញពីសាលាក្តីកូនកាត់នេះ ដោយចាត់ទុកថា៖ «អង្គការអន្តរជាតិនេះ រិះគន់ត្រឹមតែរដ្ឋាភិបាល តែពេលនេះ ទិតៀនដល់អង្គការសហប្រជាជាតិ»។
ក្នុងរបាយការណ៍ចេញផ្សាយកាលពីថ្ងៃទី ២៣ ខែមីនា អង្គការ HRW បានលើកឡើងថា សហចៅក្រមស៊ើបអង្កេតភាគីកម្ពុជាបានបដិសេធបញ្ជូនសេចក្តីសម្រេចនេះ ទៅកាន់សមត្ថកិច្ចមូលដ្ឋាន និងមានសេចក្តីរាយការណ៍មកថា សមត្ថកិច្ចមូលដ្ឋានបានបដិសេធអនុវត្តសេចក្តីសម្រេចនេះ។
HRW បានអះអាងថា សហចៅក្រមស៊ើបអង្កេតភាគីកម្ពុជា កំពុងអនុវត្តតាមគោលនយោបាយ ដែលលោកនាយករដ្ឋមន្ត្រី ហ៊ុន សែន បានប្រកាសមិនឲ្យមានការសហការនៅក្នុងករណីសំណុំរឿងទាំង ២ នេះ។
កន្លងទៅ លោក ហ៊ុន សែន បានរិះគន់ទៅលើសាលាក្តីខ្មែរក្រហម ករណីការពង្រីកនូវវិសាលភាពក្នុងការកាត់ទោសនេះ ដោយបានព្រមានថា អាចនឹងធ្វើឲ្យអតីតមន្រ្តីក្នុងសម័យខ្មែរក្រហម មានការភ័យខ្លាច និងអាចរត់ចូលព្រៃ បង្កឲ្យមានសង្គ្រាមស៊ីវិលកើតឡើងជាថ្មីទៀតនៅកម្ពុជា ។
