ខេត្តកំពង់ធំ៖ សេចក្តីសម្រេច ចុះថ្ងៃទី១០ ខែកញ្ញា ឆ្នាំ២០២៣ នេះ លោកឧត្តមសេនីយ៍ ទោ ម៉ែន លី ស្នងការនគរបាលខេត្តកំពង់ធំ បានតម្រូវឱ្យលោកអនុសេនីយ៍ឯក ហុង សារ៉ុម ត្រូវមកបម្រើការងារ នៅស្នងការដ្ឋាននគរបាលខេត្តកំពង់ធំ(ការិយាល័យបុគ្គលិក ) រៀងរាល់ម៉ោងធ្វើការ រហូតដល់មានការសម្រេចជាថ្មី។
ស្នងការនគរបាលខេត្តកំពង់ធំ លោកឧត្តមសេនីយ៍ទោ ម៉ែន លី បានចេញលិខិត សម្រេចផ្អាកការងារបណ្តោះអាសន្ន ចំពោះលោកអនុសេនីយ៍ឯក ហុង សារ៉ុម ឋានៈនាយប៉ុស្តិ៍នគរបាលរដ្ឋបាល សំព្រោជ ក្នុងស្រុកស្ទោង ខេត្តកំពង់ធំ។ មូលហេតុ ដោយ សារតែមេប៉ុស្តិ៍ ទើបតែងតាំងថ្មីនេះ ពាក់ព័ន្ធសំណុំរឿងរបស់តុលាការ។
សេចក្តីរាយការណ៍ បង្ហាញថា លោកអនុសេនីយ៍ឯក ហុង សារ៉ុម ត្រូវបានតែងតាំងជាមេប៉ុស្តិ៍នគរបាល ឃុំសំព្រោជ កាលពីថ្ងៃទី០១ ខែកញ្ញា ឆ្នាំ២០២៣ លោក ហុង សារ៉ុម បានចូលធ្វើជាប៉ូលិស នៅឆ្នាំ១៩៩៣ នៅអធិការដ្ឋាននគរបាល ស្រុកបារាយណ៍ នៅឆ្នាំ២០០៩ បានផ្ទេរ មកនៅអធិការដ្ឋាននគរបាលស្រុកស្ទោង ឆ្នាំ២០១៤ លោក ហុង សារ៉ុម ជានាយរងផ្នែកនគរបាលយុត្តិធម៌ ហើយនៅថ្ងៃ៨ ខែមីនា ឆ្នាំ២០១៥ ជាប់ ចោទពីបទសមគំនិតប្លន់ទូមាស នៅផ្សារស្ទោង។
សូមរម្លឹកថា នៅព្រឹកថ្ងៃអាទិត្យ ទី១០ ខែកញ្ញា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត បានបង្ហោះតាមហ្វេសប៊ុក និងតេឡេក្រាមថា «ក្រោយពីបានទទួលព័ត៌មាន តាមប្រភពផ្សេងៗ រួមទាំងប្រព័ន្ធផ្សព្វផ្សាយសង្គម ពាក់ព័ន្ធនឹងការតែងតាំងបុគ្គលម្នាក់ ធ្វើជាមេប៉ុស្តិ៍ នៅឃុំសំព្រោជ ស្រុកស្ទោង ខេត្តកំពង់ធំ ដែលធ្លាប់មានប្រវត្តិប្រព្រឹត្តបទឧក្រិដ្ឋ ខ្ញុំបានចេញបទបញ្ជាភ្លាមទៅ ឯកឧត្តម ស ថេត អគ្គស្នងការនគរបាលជាតិ ឱ្យពិនិត្យស្រាវជ្រាវជាមួយឯកឧត្តម ម៉ែន លី ស្នងការនគរបាលខេត្តកំពង់ធំ ជាបន្ទាន់។ ក្នុងករណី ជារឿងពិត ត្រូវតែធ្វើការកែសម្រួលភ្លាម»។
សម្តេចមហាបវរធិបតី ហ៊ុន ម៉ាណែត ក៏បានបន្ថែមថា «ខ្ញុំសូមឱ្យមានការត្រួតពិនិត្យ និងវាយ តម្លៃឲ្យបានច្បាស់លាស់នូវបុគ្គលិកលក្ខណៈរបស់បុគ្គលនីមួយៗ ឲ្យបានហ្មត់ ចត់ មុននឹងធ្វើការតែងតាំង នៅតាមបណ្ដាស្ថាប័នរដ្ឋ ទាំងស៊ីវិល និងកងកម្លាំងប្រដាប់អាវុធ ទាំងថ្នាក់ជាតិ និងក្រោមជាតិ»៕
