ភ្នំពេញ ៖ តាមប្រភពសេចក្តីរាយការណ៍បានអោយដឹងថា អ្នកឧកញ៉ា ហ៊ី គឹមហុង ជាអគ្គនាយកក្រុមហ៊ុន «ពិភពដីមាស» រួមទាំងអង្គរក្ស ចំនួន១៣នាក់ទៀត ត្រូវបានកម្លាំងនគរបាលព្រហ្មទណ្ឌកម្រិតស្រាលរាជធានីភ្នំពេញចាប់ខ្លួនបញ្ជូនទៅកាន់ស្នងការដ្ឋាននគរបាលរាជធានីភ្នំពេញ ។
សមត្ថកិច្ច ឡោមព័ទ្ធចាប់ខ្លួនអ្នកឧកញ៉ា និងគូរកន ធ្វើឡើងនាល្ងាចថ្ងៃទី០៧ ខែសីហា ឆ្នាំ២០២៣ នៅក្រុមហ៊ុនពិភពដីមាស ស្ថិតក្នុងភូមិត្រពាំងថ្ងាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ។
ប្រភពបានបន្តថា នៅពេលសមត្ថកិច្ចចូលធ្វើការសាសាកសួរអ្នកឧកញ៉ា នៅក្រុមហ៊ុនពិភពដីមាស ត្រូវកងអង្គរក្សររបស់ អ្នកឧក ញ៉ា បានវាយមកលើសមត្ថកិច្ច បណ្តលឲ្យមានរបួសជើងផងដែរ ខណៈពេលដែលសមត្ថកិច្ចចូលធ្វើការសាសាកសួរ អ្នកឧក ញ៉ា បន្ទាប់ពីប្រជាពលរដ្ឋនាំគ្នាតវ៉ាពាក់ព័ន្ធនឹងរឿងលុយថ្លៃការទិញដី ។
គួរបញ្ជាក់ថា នៅវេលាម៉ោងប្រមាណជា៨ព្រឹកថ្ងៃចន្ទនេះ មានប្រជាពលរដ្ឋជាច្រើននាក់ បាននាំគ្នាជួបប្រមូលផ្តុំទៅមុខក្រុមហ៊ុន ដើម្បីទាមទារប្រាក់ថ្លៃការទិញដី។ បន្ទាប់មក នៅវេលាម៉ោងប្រមាណជា២រសៀលថ្ងៃដដែល ប្រជាពលរដ្ឋក៏នាំគ្នាតវ៉ា ដុតកង់ឡាន ហើយត្រូវបានសមត្ថកិច្ចចុះអន្តរាគមន៍ ។
សូមរម្លឹកថា លោកឧត្តមសេនីយ៍ទោម៉ៅ ចន្ទ័មធុរិទ្ធ ស្នងការនគរបាលខេត្តកំពត បានចេញលិខិតកោះកោះហៅអ្នកឧកញ៉ាហ៊ី គឹមហុង និងឧកញ៉ា ចេង សង្ហាក់ ដែលឧកញ៉ាទាំង២រូបនេះ គឺជាអគ្គនាយកក្រុមហ៊ុន «ពិភពដីមាស»ត្រូវមកជួបជជែកដោះស្រាយគ្នា ជាមួយប្រជាពលរដ្ឋចំនួន ៤៨៤គ្រួសារ ក្នុងនោះមកពីស្រុកឈូក, ស្រុកដងទង, ស្រុកទឹកឈូ និងស្រុកបន្ទាយមាស នៅព្រឹកថ្ងៃទី២៦ ខែមិថុនា ឆ្នាំ២០២៣ កន្លងមក នេះ នៅស្នងការដ្ឋាននគរបាលខេត្តកំពត ប៉ុប៉ុន្តែអ្នកឧកញ៉ាទាំង២នាក់ មិនបានចូលខ្លួនមកបំភ្លឺនោះទេ បែរជាចាត់តំណាងម្នាក់ មកជួបប្រជាពលរដ្ឋរងគ្រោះ ទៅវិញ ទាំងដែលមិនអាចដោះស្រាយអ្វីបានទាំងអស់ ។
ប្រជាពលរដ្ឋ ដែលបានចាញ់បោកក្រុមហ៊ុនពិភពដីមាស ម្នាក់ៗអស់រាប់ម៉ឺនដុល្លារ សុទ្ធ តែបាននិយាយទាមទារថា ខ្លួនមិនទទួលបានប្រាក់ការពីក្រុមហ៊ុនទេ និងសុំអោយក្រុមហ៊ុនសងប្រាក់ដើមឲ្យគ្រប់ចំនួន ដែលខ្លួនបានដាក់អោយក្រុមហ៊ុននោះ៕