ភ្នំពេញ៖ អាជ្ញាធររាជធានីភ្នំពេញ បន្តអំពាវនាវឲ្យប្រជាពលរដ្ឋរបស់ខ្លួន ត្រូវបញ្ឈប់ការពឹងពាក់ ផ្នែកសេវា ពីអ្នករត់ការ ដើម្បីកាត់បន្ថយការចំណាយក្រៅផ្លូវការឥតប្រយោជន៍ និងមានភាពអូសបន្លាយ។
លោក ប៉ា សុជាតិវង្ស អភិបាលរាជធានីភ្នំពេញ បានជំរុញឲ្យអាជ្ញាធរថ្នាក់ខណ្ឌ និងថ្នាក់សង្កាត់ទាំងអស់នៅជុំវិញ រាជធានីភ្នំពេញត្រូវ ប្តូរគោលជំហរពីអ្នកដឹកនាំទៅជាអ្នកយកចិត្តទុក ដាក់ផ្តល់សេវាសារ ធារណៈជូនប្រជាពលរដ្ឋឲ្យកាន់តែប្រសើរឡើងនិងមានប្រសិទ្ធិភាពខ្ពស់ ដើម្បីឲ្យប្រជាពលរដ្ឋ មានទំនុកចិត្តមកលើរដ្ឋបាលសាធារណៈ។ លោកអភិបាល បានថ្លែងដូច្នេះ នៅក្នុងពិធីប្តូរប្រធានក្រុមប្រឹក្សាសង្កាត់ និងជាចៅសង្កាត់ក្បាលកោះ ខណ្ឌច្បារអំពៅ កាលពីព្រឹកថ្ងៃទី១៤ មករា ដើម្បីធានានិរន្ត រភាពការងារ និងបំរើប្រជាពលរដ្ឋឲ្យបានល្អ។ លោកអភិបាលបានបញ្ជាក់ថា ចាប់ពីពេលនេះតទៅ ប្រជាពលរដ្ឋខ្លួនឯងទាំងអស់ ត្រូវស្វែងយល់ឲ្យកាន់តែស៊ីជម្រៅ ក្នុងការមកទទួលសេវាសាធារណៈ ដូចជា ការធ្វើសំបុត្រកំណើត សំបុត្រអាពាហ៍ពិពាហ៍ ពិសេសអត្តសញ្ញាណប័ណ្ណគ្រួសារ ត្រូវតែធ្វើនៅសង្កាត់ ចំណែកសេវាជំនាញផ្សេងៗពាក់ពន្ធ័ទៅសុរិយោដី ធ្វើស្លាកលេខម៉ូតូ ឬអាជីវកម្មត្រូវទៅកាន់តការិយាល័យច្រកចេញចូលតែមួយ ដែលមានស្នាក់ការនៅតាមសាលាខណ្ឌនីមួយៗ ។
លោកបានបន្តថា ការទៅទទួលសេវាសាធារណៈដោយខ្លួនឯង ដូចជានៅសាលាសង្កាត់ និងការិយាល័យច្រកចេញចូលតែមួយក្តី គឺមានប្រសិទ្ធភាព ភាពសក្តិសិទ្ធ តម្លាភាព គណនេយ្យភាព រយៈពេលខ្លី ច្បាស់លាស់ អាចជឿទុកចិត្តបាន តម្លៃថោក និងប្រកបដោយគុណភាពល្អ ។ តាមរយៈនេះ លោកបានបញ្ជាក់ទៀតថា ប្រជាពលរដ្ឋមិនគួរទៅពឹងពាក់អ្នករត់ការបន្តទៀតឡើយ ដើម្បីបញ្ជៀសបាននូវជនឆ្លៀតឱកាសកេងចំណេញ ដោយហេតុថា កន្លងមកពួកអ្នកទាំងនេះបាន បំប៉ោងតម្លៃបង្កើតបានជាអំពើពុករលួយ ឬការបំប៉ោងសេវាសាធារណៈ ដែលធ្វើឲ្យមន្ត្រីអ្នកផ្តល់សេវាជាប់ឈ្មោះមិនល្អ ធ្វើឲ្យប្រជាពលរដ្ឋមានការថ្នាំងថ្នាក់មកលើអាជ្ញាធរដែលជាថ្នាក់ដឹងនាំទៅវិញ។
លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីសន្តិភាពនិងអភិវឌ្ឍន៍ បានទទួល ស្គាល់ថា ការមកទទួលសេវាសាធារណៈដោយខ្លួនឯង នៅតាមសង្កាត់ ឬការិយាល័យច្រកចេញ ចូលតែមួយនាពេលបច្ចុប្បន្ន គឺជាប្រការមួយល្អដោយមិនចំណាយលុយក្រោមតុ និងគ្មានអំពើពុករលួយ។ ទោះជាយ៉ាងនេះក្តីលោកថា អាជ្ញាធរគួរតែបង្កើតយន្តការបន្ថែមទៀត ដោយកំណត់តម្លៃ និងរយៈពេលផ្តល់សេវាឲ្យបានច្បាស់លាស់ កន្លែងផ្តល់សេវា ត្រូវមានដំណោះស្រាយពិតប្រាកដ កុំរត់ទៅពឹងពាក់កន្លែងផ្សេង ហើយមន្ត្រីផ្តល់សេវាត្រូវមានអកប្បកិរិយា និងពាក្យសម្តីឲ្យបានសមរម្យជាមុន។ ជាមួយគ្នានេះ អាជ្ញាធររាជធានីត្រូវពន្លឿនការបង្កើតការរិយលយ័ច្រកចេញចូលតែ មួយឲ្យបានគ្រប់ខណ្ឌនៅទូទាំងរាជធានីភ្នំពេញ។
គួររំលឹកថា៖ ការិយាល័យច្រកចេញចូលតែមួយ គឺជាកន្លែងប្រមូលផ្តុំសេវា សាធារណៈដែលមានគុណភាព ឆ្លើយតបទៅនឹងតម្រូវការរបស់ប្រជាពលរដ្ឋ។ ជាគោលការណ៍រាល់ទម្រង់បែបបទ និងលិខិតផ្សេងៗ សម្រាប់ផ្តល់ជូនប្រជាពលរដ្ឋដើម្បីបំពេញ ត្រូវបានរៀបចំអោយមានលក្ខណៈ សាមញ្ញ ខ្លី ច្បាស់លាស់ និងងាយយល់ ហើយចំណែកប្រជាពលរដ្ឋខ្លះមិនចេះអក្សរ មិនអាចបំពេញលើសំណុំបែបបទនោះបាន មន្ត្រីផ្នែកជួរមុខ នៃការិយាល័យច្រកចេញចូលតែមួយជួយបំពេញជូនដោយគ្មានគិតកម្រៃសេវាអ្វីឡើយ។ ដោយឡែក នៅទូទាំងរាជធានីភ្នំពេញ មានការិយាល័យច្រកចេញចូលតែមួយចំនួន៨ខ័ណ្ឌ ហើយ មាននៅខណ្ឌដូនពេញ ចំការមន ទួលគោក ពោសែនជ័យ សែនសុខ ៧មករា ដង្កោ និង ខណ្ឌឬស្សីកែវ ចំណែកខណ្ឌដែលមិនទាន់មាន គឺមានខណ្ឌច្បារអំពៅ មានជ័យ ជ្រោយចង្វារ និងខណ្ឌព្រែកព្នៅព្រោះជាខណ្ឌដែលទើបបង្កើតថ្មី ៕