ខេត្តកោះកុង ៖ ក្រោយពីបណ្តាញព័ត៌មានជាច្រើនបានចុះផ្សាយអំពីរឿងអាស្រូវពុករលួយរបស់លោកប្រធានមន្ទីរនិងបណ្តុះបណ្តាវិជ្ជាជីវៈខេត្តកោះកុង យក់ សង្វាត និងលោកស្រីអនុប្រធានការិយាល័យរដ្ឋបាលនិងហិរិញ្ញវត្ថុឈ្មោះ ម៉េង សុវណ្ណ មល្លិកា និងបក្ខពួកផ្សេងទៀត បានធ្វើឲ្យមន្ត្រីជាច្រើននៅក្នុងមន្ទីរមួយនេះសម្តែងការគាំទ្រចំពោះការចុះផ្សាយនិងថែមទាំងទំលាយរឿងអាស្រូវជាច្រើនទៀតរបស់លោកប្រធានមន្ទីរនិងបក្ខពួកសំរាប់ចុះផ្សាយ។
តាមប្រភពបានឲ្យដឹងថាចាប់តាំងពីខែមីនាឆ្នាំ២០១២ក្រោយពីលោក យក់ សង្វាត បានឡើងធ្វើជាប្រធានមន្ទីរការងារនិងបណ្តុះបណ្តាវិជ្ជាជីវៈខេត្តកោះកុងបន្តពីលោកស្រី រ័ត្ន យ៉ង នោះភ្លាមគឺលោកប្រធានមន្ទីរ យក់ សង្វាត បានបង្កើតយុទ្ធសាស្ត្រនិងសហការយ៉ាងជិតស្និទ្ធជាមួយលោកស្រី ម៉េង សុវណ្ណ មល្លិកា ដើម្បីប្រព្រឹត្តអំពើពុករលួយកឹបកេងថវិកាជាតិលើគ្រាប់ជំពូក។ គ្រាន់តែលោក យក់ សង្វាត បានឡើងជាប្រធានមន្ទីរភ្លាមគាត់បានកឹបកេងប្រាក់បានយ៉ាងច្រើនសន្ធឹកសន្ធាប់ឆ្នាំ២០១២ ហើយភ្លាមៗនោះរូបគាត់បានយកលុយទៅទិញដីមួយកន្លែងនៅភូមិស្មាច់ង៉ាន សង្កាត់ស្មាច់មានជ័យ ក្រុង ខេមរៈភូមិន្ទ និងក្រោយមកនៅចុងឆ្នាំ២០១៤ គាត់បានចំណាយថវិកាសាងសង់ផ្ទះលើទីតាំងដីខាងលើ ដែលតាមការវាយតម្លៃនិងត្រូវចំណាយថវិកាមិនតិចជាត១០ម៉ឺនដុល្លារនោះទេ។
តាមប្រភពបានឲ្យដឹងថា នៅឆ្នាំ២០១៣ និងឆ្នាំ២០១៤លោកប្រធានមន្ទីរ យក់ សង្វាត បានកឹបកេងថវិកាមានដូចជាថវិកាសម្ភារផ្គត់ផ្គង់ថែទាំ ថវិកាផ្គត់ផ្គង់សំភារៈផ្នែករដ្ឋាបាលថ្លៃឈ្នួលនិងបន្ទុក(អសង្ហារិម) ការថែទាំនិងជួសជុលអាគារ ការថែទាំនិងជួសជុលមធ្យោបានដឹកជញ្ជូន ការថែទាំនិងឧបករណ៍ការិយាល័យ ការទំនាក់ទំនងនិងផ្សព្បផ្សាយសារធារណៈ ចំណាយទូទាត់សោហុយក្នុងប្រទេស កឹបកេងប្រាក់ដំណើរលំហែនិងសិក្សា និងថវិកាសម្រាប់បណ្តុះបណ្តាវិជ្ជាជីវៈនៅតាមសហគមន៍។ល។
តាមប្រភពបានឲ្យដឹងថា ចំពោះថវិកាដែលលោក យក់សង្វាត និងបក្ខពួកកឹបកេងបានគឺក្នុងមួយឆ្នាំៗគឺមានចំនួនចន្លោះពីជិត៣០០លានរៀលទៅ៤០០លានរៀល។ ជាក់ស្តែងកន្លងទៅគឺដូចជាប្រាក់រេជ្ជទ័យក្នុងមួយជុំជា២០លានរៀលក្នុងមួយឆ្នាំមាន៨ជុំគឺត្រូវបានលោកប្រធានមន្ទីរកឹបកេងស្ទើរទាំងស្រុង។ ចំណែកប្រាក់ទូទាត់សោហុយក្នុងប្រទេសដែលក្នុងមួយឆ្នាំមានជាង៥០លានរៀលគឺត្រូបបានលោកប្រធានមន្ទីរស៊ីដាច់មិនតិចជាងពាក់កណ្តាល។ ចំពោះរបបប្រេងឥន្ទនៈក្នុងមួយឆ្នាំចំណាយជិត៣០លានរៀលអ្នកដែលទទួលបានផលប្រយោជន៍ពីប្រេងនេះមានតែលោកប្រធានមន្ទីរនិងបក្ខពួក។ ចំណែកមន្ត្រីដែលមិនមែនបក្ខពួកគឺបានយ៉ាងច្រើន១០ទៅ២០លីត្រ ហើយមន្ត្រីខ្លះមិនបានស្គាល់របបប្រេងរបស់មន្ទីរមួយលីត្រក៏មានដែរ។ ចំពោះប្រេងនៅសល់ជាងពាក់កណ្តាលគឺលោកប្រធានមន្ទីរនិងបក្ខពួកទាំងអស់។ រីឯការចំណាយលើការសាងសង់អាគារមន្ទីរគឺក្នុងមួយឆ្នាំៗគឺចាយអស់មិនតិចជាង២៥០លានរៀល ៣ឆ្នាំជាប់គ្នាអាគារមន្ទីរនៅតែធ្វើមិនហើយ បូករួមទាំងប្រធានមន្ទីរចាស់ឡើង៤ឆ្នាំចំណាយប្រាក់សរុបខ្ទង់១០០០លានរៀលទៅហើយ បែរជាទៅជិតហើយផ្ទះដ៏ធំស្កឹមស្កៃរបស់លោកប្រធានមន្ទីរទៅវិញចំពោះការចំណាយលើការសាងសង់មន្ទីរនេះបើគ្មានអំពើពុករលួយគឺមន្ទីរប្រហែលជាសាងសង់រួចតាំងពីចុងឆ្នាំ២០១២និងចំណាយថវិកាមិនលើសពី៣០០លានរៀលនោះទេ។
ចំណែកប្រាក់បណ្តុះបណ្តាវិជ្ជាជីវៈក្នុងមួយឆ្នាំៗបានចំណាយអស់ប្រាក់ជាង៨០លានរៀលសម្រាប់បណ្តុះបណ្តាចំនួន៩វគ្គតែធាតុពិតការចំណាយជាក់ស្តែងនៅឆ្នាំ២០១៣គឺអស់ត្រឹមជិត២០លានរៀលនិងបង្រៀនបានត្រឹមតែ៦វគ្គ ហើយនៅពេលមានការសួរដេញដោលពីក្រុមអធិការកិច្ច លោកប្រធានមន្ទីរ យក់ សង្វាត ឆ្លើយថាការបង្រៀន៣វគ្គទៀតគឺផ្តល់ជូនអោយមជ្ឍមណ្ឌលបណ្តុះបណ្តាវិជ្ជាជីវៈជាអ្នកទទួលអនុវត្តជំនួសការិយាល័យបណ្តុះបណ្តាវិជ្ជាជីវៈទៅវិញ។
នៅឆ្នាំ២០១៤ថវិការសំរាប់បណ្តុះបណ្តាបានចំណាយអស់ជាង៨០លានរៀលដដែលនិងបង្រៀនបានចំនួន៩វគ្គតែការចំណាយថវិការជាក់ស្តែងគឺអស់យ៉ាយច្រើនត្រឹមតែ៣០លានរៀលនៅសល់ប៉ុន្មានគឺលោកប្រធានមន្ទីរនិងបក្ខពួកស៊ីដាច់ទាំងអស់ដោយមិនអោយសល់ឆ្អឹងទៀតផង។ ចំណែកថវិកាដំណើរលំហែនិងសិក្សាក្នុងមួយឆ្នាំៗបានចំណាយជិត២០លានរៀលប៉ុន្តែការចំណាយពិតអស់យ៉ាងច្រើន៥លានរៀលគឺសល់ប៉ុន្មានគឺស៊ីទាំងអស់។
សម្រាប់នៅឆ្នាំ២០១៤នេះមន្ទីរការងារខេត្តកោះកុងបានចំណាយថវិកាទិញរថយន្តមួយគ្រឿងម៉ាក់NISSANសេរីឆ្នាំ២០០៧អស់ចំនួនទឹកប្រាក់១២០លានរៀល ដោយលោកប្រធានមន្ទីរ យក់ សង្វាត ជាអ្នកកាន់ប្រាក់ទៅទិញ មិនមែនតាមរយៈលទ្ធកម្មដែលផ្ទុយពីនិតិវិធីហិរិញ្ញវត្ថុ បើតាមការពិនិត្យតម្លៃរថយន្តនេះនៅលើទីផ្សារពិតប្រាកដមានតម្លៃយ៉ាងច្រើនត្រឹមតែ១៨០០០ទៅ២០០០០ដុល្លាដូច្នេះគេអាចកឹបកេងប្រាក់បាន៤០លានរៀលយ៉ាងតិច ៕